मध्य प्रदेशातील ग्वाल्हेरमधून एक धक्कादायक घटना समोर आली आहे. बायकोने स्वयंपाक करण्यास नकार दिल्याने नशेत असलेल्या नवऱ्याने तिच्यावर गोळ्या झाडून हत्या केली. शनिवारी रात्री ११ वाजण्याच्या सुमारास मुरार परिसरात ही घटना घडली आहे. याप्रकरणी पोलीस ठाण्यात तक्रार दाखल झाली असून आरोपी पतीला अटक करण्यात आली आहे.

मिळालेल्या माहितीनुसार, आरोपीचे नाव सोनू तोमर असे आहे. सोनूला दारूचे व्यसन होते. तो दररोज दारू पिऊन बायकोला त्रास द्यायचा. घटनेच्या दिवशी आरोपी सोनूची बायको आजरी होती. तरीही सोनुने तिच्यामागे स्वयंपाक करण्याचा आणि चहा बनवून देण्याचा तगादा लावला होता. मात्र आरोपीच्या पत्नीने जेवण बनवायला नकार दिला.

बायकोचे उत्तर ऐकून संतापलेल्या सोनुने बंदूक काढून थेट बायकोच्या डोक्यात गोळ्या झाडल्या. या दुर्घटनेत आरोपीच्या बायकोचा जागीच मृत्यू झाला. या घटनेवेळी घरी सोनूची दोन अल्पवयीन मुलं आणि पालक होते. आरोपीच्या वडिलांनी पोलिसांना घटनेची माहिती दिली. माहिती मिळताच पोलिस फॉरेन्सिक टीमसह घटनास्थळी पोहोचले. मृतदेह शवविच्छेदन तपासणीसाठी पाठवण्यात आला.

दरम्यान बायकोची हत्या करून सोनुने घटनास्थळावरुन पळ काढला. मात्र तपासाची चक्रे वेगाने फिरवत पोलिसांनी काही तासांमध्ये आरोपीला दारू पिताना एका अड्ड्यावरून उचलले आणि बेड्या ठोकल्या, शिवाय गुन्हा देखील दाखल करण्यात आला आहे. चौकशीदरम्यान, आरोपीने खुनातील हत्यार फेकून दिल्याचा दावा केला. पोलीस त्याचा शोध घेत असून त्याचे पूर्वीचे कोणतेही गुन्हेगारी रेकॉर्ड आहेत का याचा तपास सुरू आहे.