पश्चिम बंगालच्या मुख्यमंत्री ममता बॅनर्जी यांच्या हेलिकॉप्टरसमोर ड्रोनने घिरट्या मारल्याची घटना समोर आली आहे. ड्रोनने घिरट्या मारल्यानंतर मालतीपूरमध्ये एकच खळबळ उडाली आहे. या घटनेने मुख्यमंत्र्यांच्या सुरक्षा व्यवस्थेवरून प्रश्न चिन्ह उपस्थित करण्यात आले असून चौकशीचे आदेश देण्यात आले आहेत.

ममता बॅनर्जी मालतीपूरमध्ये जनतेला संबोधित करण्यासाठी हेलिकॉप्टरमधून आल्या. त्यांच्या त्याच दिवशी तीन रॅली होत्या. त्यांनी आधी माणिकचकमध्ये सभेत उपस्थित जनतेला संबोधित केले. त्यानंतर मालतीपूरहून त्यांना गाजोलमध्ये तिसऱ्या रॅलीसाठी रवाना व्हायचं होतं.

प्रत्यक्षदर्शीनुसार, मुख्यमंत्री हेलिपॅडवरील हेलिकॉप्टर जवळ पोहोचल्या . त्यावेळी एक ड्रोन हेलिकॉप्टरला घिरट्या घालत होता. त्यावेळी ममता बॅनर्जी काही वेळासाठी थांबल्या. त्यानंतर त्यांनी पोलिसांना सतर्क राहण्याचे निर्देश दिले. मुख्यमंत्री ममता बॅनर्जी यांनी म्हटलं की, 'पोलिसांनी या ड्रोनवर लक्ष द्यावे. ड्रोन कोणाचा आहे, याचा घेतला पाहिजे. त्यांची ओळख समोर आली पाहिजे'.

प्राथमिक चौकशीत ड्रोन नेमका कुणाचा आहे, हे समोर आलेले नाही. अधिकाऱ्यांनी अद्याप संबंधित माहिती दिलेली नाही. मुख्यमंत्र्यांच्या निर्देशानंतर पोलीस आणि सुरक्षा यंत्रणांनी तपासाला सुरुवात केली आहे.

तत्पूर्वी, काही दिवसांपूर्वी मुख्यमंत्र्यांच्या दौऱ्यात अनेक अडथळे समोर आले आहेत. २६ मार्च रोजी खराब वातावरणामुळे विमान कोलकाता विमानतळावर लँडिग करण्यात अडथळे आले होते. त्यावेळी ७० मिनिटे विमानाने घिरट्या घातल्या होत्या. यावेळी फ्लाइंग क्लबमध्येही लँडिगचे प्रयत्न यशस्वी ठरले होते. त्यानंतर शेवटी दमदम विमानतळावर लँडिंग करण्यात आले होते.

या व्यतिरिक्त १ एप्रिल रोजी मुर्शिदाबाद जिल्ह्यातील बरनायामध्ये रॅली झाल्यानंतर हेलिकॉप्टरला खराब वातावरणाचा फटका बसला होता. खराब वातावरणामुळे नबाग्राममध्ये हेलिकॉप्टर उतरवण्यात आलं नाही. पायलटने सुरक्षेचा विचार करून हेलिकॉप्टर दुसऱ्या ठिकाणी लँडिंग केलं. त्यानंतर मुख्यमंत्री बॅनर्जी रस्ते मार्गाने निश्चित स्थळी पोहोचल्या.