दिल्लीतील जंतरमंतरवर सुरु असलेल्या सीजेपीच्या आंदोलनादरम्यान दिल्ली पोलिसांनी भाजपच्या माजी आमदाराच्या मुलीसह दोन हजारांहून अधिक आंदोलकांना ताब्यात घेतल्याची माहिती समोर आली आहे. उत्तर प्रदेशातील फतेहपूर सदरचे माजी भाजप आमदार विक्रम सिंह यांची मुलगी यशस्विनी राजे सिंह हिलाही पोलिसांनी ताब्यात घेतले. यशस्विनीने स्वतः इन्स्टाग्रामवर पोस्ट करून याबाबत माहिती दिली.

यशस्विनी राजे सिंह हिने दिलेल्या माहितीनुसार, गुरुद्वाराजवळील एका उद्यानात बसलेली असताना दिल्ली पोलिसांनी तिला ताब्यात घेतले. सध्या ती केशवपूरम पोलीस ठाण्यात असल्याचे तिने पोस्टमध्ये म्हटले आहे. या घटनेमुळे राजकीय वर्तुळात चर्चेला उधाण आले आहे.

कोण आहे यशस्विनी राजे सिंह?

यशस्विनी राजे सिंह ही उत्तर प्रदेशातील फतेहपूर सदरचे माजी भाजप आमदार विक्रम सिंह यांची मुलगी आहे. नीट परीक्षेतील पेपरफुटीच्या प्रकरणानंतर विद्यार्थ्यांनी केलेल्या आंदोलनांमध्ये तिने सहभाग घेतला होता. या आंदोलनादरम्यान तत्कालीन केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करण्यात आली होती. त्यावेळी यशस्विनीने सीजेपी अभियानालाही पाठिंबा दिला होता.

दिल्लीत कडेकोट पोलीस बंदोबस्त

मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी जंतरमंतर येथे सीजेपीचे आंदोलन सुरु आहे. या पार्श्वभूमीवर दिल्ली-एनसीआर परिसरात ९ ऑक्टोबरपासून सतर्कतेचा इशारा देण्यात आला होता. राजधानीत ४० हजारांहून अधिक दिल्ली पोलीस आणि केंद्रीय सशस्त्र पोलीस दलाचे (CAPF) जवान तैनात करण्यात आल्याचे वृत्त आहे. अनेक प्रमुख ठिकाणी बॅरिकेड्स आणि स्पाइक स्ट्रिप्स लावून वाहतुकीवर निर्बंध घालण्यात आले होते.

विरोधी पक्षांच्या नेत्यांनाही ताब्यात घेतले

या आंदोलनाच्या पार्श्वभूमीवर पश्चिम बंगालच्या मुख्यमंत्री ममता बॅनर्जी, दिल्लीचे माजी मुख्यमंत्री अरविंद केजरीवाल, केरळचे मुख्यमंत्री पिनराई विजयन आणि त्रिपुराचे माजी मुख्यमंत्री माणिक सरकार यांनाही पोलिसांनी ताब्यात घेतले होते. ममता बॅनर्जी यांना साऊथ अव्हेन्यू परिसरात पक्षाच्या खासदारांसह रोखण्यात आले. पोलिसांनी आंदोलनस्थळी जाण्यास मज्जाव केल्यानंतर त्या बसथांब्यावर बसल्या. त्यानंतर त्यांना खासदार डेरेक ओ'ब्रायन आणि डोला सेन यांच्यासह पोलीस बसमधून नेण्यात आले. यावेळी ममता बॅनर्जी यांनी तोंडावर पट्टी बांधून पोलीस कारवाईचा निषेध नोंदवला.