भारताची राजधानी दिल्लीत चक्क ८० लाखांची चोरी झाल्याची घटना घडलीये. चोरीच्या घटनांमध्ये दिवसेंदिवस वाढ होत चाललीये. यावेळी चोराने बंदुकीचा धाक दाखवून आणि फायरींग करुन व्यापाऱ्यांकडून ८० लाख रुपये लंपास केले आणि पळ काढला आहे. ही घटना लाहोरी गेट पोलिस स्थानकातील हवेली हैदर चांदणी चौक परिसरात घडली आहे. या घटनेचा व्हिडिओ सध्या सोशल मीडियावर व्हायरल होतोय.

व्हायरल होत असलेल्या व्हिडिओमध्ये तुम्ही पाहू शकता की, एक व्यापारी बॅग घेऊन जाताना दिसून येत आहे. त्यावेळी हा दरोडेखोर त्याचा पाठलाग करतो. संधी मिळताच हा दरोडेखोर आपली बंदूक काढतो आणि त्याला बंदुकीचा धाक दाखवून बॅग हिसकावून घेण्याचा प्रयत्न करतो. दोघांमध्ये झटापट होते.

बॅग हिसकावून घेत असताना तो व्यापाराला गोळी झाडण्याची धमकी देतो. शेवटी तो बॅग हिसकावून पळ काढण्यात यशस्वी होतो. व्यापारी त्याचा पाठलाग करण्याचा प्रयत्न करतो, मात्र याचा काहीच फायदा होत नाही, कारण चोर ८० लाख रुपये घेऊन पळून गेलेला असतो.

सीसीटीव्हीचा व्हिडिओ व्हायरल

ही घटना घडताच व्यापाऱ्याने पोलिस स्थानकात धाव घेतली. त्याने दरोडेखोराविरोधात तक्रार नोंदवली. या घटनेचा सीसीटीव्ही पोलिसांच्या हाती लागला आहे. आता पोलिस या प्रकरणाची कसून चौकशी करत आहेत.

दिल्ली आणि देशातील महत्वाच्या शहरांमध्ये इतकी मोठी रक्कम चोरी होण्याची ही पहिलीच वेळ नाही. यापूर्वीही अनेकदा चोरीच्या घटना घडल्या आहेत. काही दिवसांपूर्वी बिहारमध्ये बंदुकीचं धाक दाखवून ज्वेलरी शॉपमध्ये दरोडा घातल्याची घटना घडली होती. या घटनेचा व्हिडिओ देखील सोशल मीडियावर व्हायरल झाला होता.