एखाद्या गोष्टीची अतिप्रमाणात हाव असणं धोकादायक ठरू शकतं. पैसे, संपत्ती यापुढे कत्येक जणांना अनेकदा नात्यांचा देखील विसर पडतो. अशाच प्रकारची मानवतेला काळिमा फासणारी धक्कादायक घटना दिल्लीतून समोर आली आहे. एका महिलेने संपत्तीसाठी तिच्या सासऱ्यांवर हल्ला करून हत्या केली आहे. या घटनेने परिसरात भीतीचे वातावरण निर्माण झाले आहे.

मिळालेल्या माहितीनुसार, मृत व्यक्तीचे नाव नरेश कुमार असून ते निवृत्त भारतीय हवाई दलाचे अधिकारी होते. तर आरोपी महिलेचं नाव गीता कुमार असे आहे. सदर घटना दिल्लीतील बिंदापूर भागात घडली आहे. दिल्ली पोलिसांना २७ डिसेंबर रोजी सकाळी १०:४६ वाजता बिंदापूरच्या मानस राम पार्क परिसरात एका पुरूषाच्या हत्येची तक्रार करणारा पीसीआर कॉल आला. माहिती मिळताच, स्थानिक पोलिस ठाण्यातील एक पथक तात्काळ घटनास्थळी पोहोचले. पोलिसांनी घटनास्थळाला घेराव घालून तपास सुरू केला. सुरुवातीला पोलिसांनाही परिस्थिती संशयास्पद वाटली. पोलिसांना नरेश कुमार त्यांच्या घराच्या छतावर बेशुद्ध अवस्थेत पडलेले आढळले. त्यांच्या शरीरावर जखमा आढळून आल्याने हल्ल्याचा संशय निर्माण झाला.

नरेश कुमार यांना ताबडतोब रुग्णालयात नेण्यात आले. मात्र, तपासणीनंतर डॉक्टरांनी त्याला मृत घोषित केले. पोलिसांनी मृतदेह ताब्यात घेतला आणि तो शवविच्छेदनासाठी पाठवला. मृत नरेशचा मुलगा प्रवीण याची पत्नी गीता हिने पोलिसांना सांगितले की तिच्या सासऱ्यांवर हल्ला झाला आहे. पण जेव्हा पोलिसांनी मृताची सून गीता हिची चौकशी केली तेव्हा त्यांना तिच्या जबाबात विरोधाभास आढळला. त्यानंतर गीताची पुन्हा चौकशी सुरू केली. गीता भारावून गेली आणि तिने जे घडलं ते खरं खरं कबूल केलं.

गीताने पोलिसांना सांगितले की, तिच्यामध्ये आणि तिच्या सासऱ्यांमध्ये वारंवार संपत्ती वरून कडाक्याचे वाद व्हायचे. हे वाद एकदिवशीचे नसून दररोज होऊ लागले. हत्येच्या दिवशी या वादाने टोक गाठले. सासरा ऐकत नव्हता म्हणून संतापलेल्या गीताने त्यांच्यावर हल्ला केला. या हल्ल्यात त्यांचा मृत्यू झाला. नरेश कुमार यांच्या पत्नीचे ऑगस्टमध्ये निधन झाले होते. गीताचा पती परवीन हैदराबादमध्ये काम करतो आणि घटना घडली तेव्हा ते तिकडेच कमानिमित्त होते . या घटनेनेनंतर पोलिसांनी गीताला ताब्यात घेऊन हत्ये अंतर्गत गुन्हा दाखल केला आहे. शिवाय पुढील तपास पोलीस करत आहेत.