राज्यसभा निवडणुकीत क्रॉस व्होटिंग करणं काँग्रेसच्या आमदारांना चांगलंच महागात पडणार आहे. ओडिशात क्रॉस व्होटिंगमुळं राज्यसभा निवडणुकीत पराभव झाल्यानं काँग्रेसनं बंडखोर आमदारांवर कारवाई करण्यास सुरुवात केली आहे. भाजपच्या पाठिंब्यावर उभ्या असलेले उमेदवार दिलीप रे यांना मतदान करणाऱ्या तीन आमदारांना पक्षातून निलंबित करण्यात आले आहे.

सनाखेमुंडी आमदार रमेश चंद्र जेना, मोहानाचे दसरथी गोमांगो आणि कटकच्या आमदार सोफिया फिरदोस अशी या काँग्रेसच्या तीन नेत्यांची नावं आहेत. या नेत्यांनी सोमवारी झालेल्या राज्यसभा निवडणुकीत पक्षाने आदेश दिलेले असताना दिलीप रे यांना मतदान केले होते. या नेत्यांना पक्षाने निलंबित केले आहे. ओडिशा काँग्रेसने सोशल मीडियावर ही माहिती दिली. काँग्रेसची फसवणूक करणाऱ्यांनी देशासोबत विश्वासघात केला आहे, असं पोस्टमध्ये म्हटलं आहे.

आमदारांच्या निलंबनाची कारवाई संपूर्ण प्रक्रियेचा आढावा घेतल्यानंतरच करण्यात आली आहे, असे ओडिशा काँग्रेसच्या मीडिया सेलचे प्रभारी अरबिंद दास यांनी स्पष्ट केले. या नेत्यांनी राज्यसभा निवडणुकीत काँग्रेसविरोधी काम केले आहे. राज्यसभा निवडणुकीत सर्व आमदारांना याबाबत ताकीदही देण्यात आली होती. तरीही त्यांनी पक्षविरोधी काम केले आहे, असेही ते म्हणाले.

निलंबनाच्या कारवाईनंतर आता या नेत्यांचे विधानसभा सदस्यत्वही रद्द करण्यात येईल. यासंबंधात लवकरच आम्ही विधानसभा अध्यक्षांना नोटिस देणार आहोत, अशी माहितीही दास यांनी दिली. काँग्रेसचे प्रदेशाध्यक्ष भक्त चरण दास यांनीही यावर प्रतिक्रिया दिली आहे. या नेत्यांकडून ही अपेक्षा नव्हती. या आमदारांनी पक्षासोबत गद्दारी केली आहे. या नेत्यांचे विधानसभा सदस्यत्व रद्द करण्यासाठी पावले उचलण्यात येतील, असा इशाराही त्यांनी दिला.

संबंधित नेत्यांवर केलेल्या कारवाईवर पक्षश्रेष्ठींनीही समाधान व्यक्त केले आहे. या नेत्यांविरोधात कारवाई करण्याची आवश्यकता होती, असे पक्ष नेतृत्वाचे म्हणणे आहे. या काँग्रेस आमदारांसह मुख्य विरोधी पक्ष बीजेडीच्या आठ आमदारांनीही राज्यसभा निवडणुकीत क्रॉस व्होटिंग केली होती. त्यामुळे विरोधी पक्षाचे उमेदवार दत्तेश्वर होता यांचा पराभव झाला. बीजेडीने दत्तेश्वर यांना निवडणूक रिंगणात उतरवले होते आणि काँग्रेसने त्यांना पाठिंबा जाहीर केला होता. दरम्यान, काँग्रेसकडून बिहार आणि हरयाणातही अशा प्रकारची कारवाई करण्यात येणार आहे.