मध्य प्रदेशच्या छतपूर जिल्ह्यात निवडणूक आणि जुन्या वैमनस्यातून काँग्रेस नेता महूम सिंह बुंदेा उर्फ हल्के राजा यांच्यावर जीवघेणा हल्ला झाला आहे. काँग्रेस नेत्यावर गोळीबाराच्या घटनेने परिसरात खळबळ उडाली आहे. छतपूरच्या इमलिया तिराहजवळ हल्लेखोरांनी कार थांबवून अंधाधुंद गोळीबार केला. या हल्ल्यात काँग्रेस नेते गंभीर जखमी झाले. त्यांना तातडीने रुग्णालयात दाखल करण्यात आलं असून त्यांची प्रकृती नाजूक असल्याचे सांगण्यात आलं आहे.

छतपूरच्या राजनगर पोलीस स्टेशनच्या हद्दीतील विक्रमपूर गावात ही घटना घडली आहे. गोळीबारात गंभीर जखमी झालेले नेत्याचे भाचे अभय राज सिंह बुंदेला यांच्या माहितीनुसार, हल्के राजा छतरपूरहून गावी निघाले होते. या दरम्यान २ ते ३ वाहनांमधून ७ ते ८ हल्लेखारांनी त्यांच्या कारला घेरलं. त्यानंतर हल्लेखोरांनी जवळपास ६ ते ७ राऊंड गोळीबार केला. त्यानंतर बेसबॉल बॅटनेही हल्ला केला.

हल्के राजा यांच्या दोन पाय, मांडी आणि खांद्यावर गोळी लागली आहे. गोळीबारानंतर आरोपी घटनास्थळावरून पळ काढला. काँग्रेस नेते हल्के राजा यांना तातडीने घटनास्थळाजवळील रुग्णालयात दाखल करण्यात आलं. प्राथमिक उपचार केल्यानंतर त्यांना तातडीने ग्वालियर येथील रुग्णालयात हलवण्यात आलं.

नातेवाईकांनी गावातील लोकपाल सिंह बुंदेला, वीरेंद्र सिंह बुंदेला, सत्यम सिंह यांच्या सहित इतर लोकांवर गोळीबार केल्याचा आरोप केला आहे. सर्व संशयित आरोपी एकाच पक्षातील आहेत. जुन्या वैमनस्यातून वाद झाल्याचे सांगण्यात येत आहे.

रुग्णालयातील डॉक्टर अनिरुद्ध चतुर्वेदी यांनी सांगितलं की, हल्के राजा यांची प्रकृती नाजूक आहे. त्यांच्या दोन्ही पायाला गोळी लागली आहे. डॉक्टरांची टीम आयसीयूमध्ये उपचार करत असून त्यांच्यावर शस्त्रक्रिया सुरू आहे.