लुधियाना जिल्ह्यातील मच्छीवारा शहरातील तखरन गावात काँग्रेसचे स्थानिक नेते परमिंदर तिवारी यांची हत्या केली आहे. रविवारी संध्याकाळी साडेसहा वाजता ते बसस्थानकाजवळील त्यांच्या निवासस्थानी खुर्चीवर बसले असताना दोन हल्लेखोर त्यांच्याजवळ आले. त्यांनी मागून कुऱ्हाडीने त्याच्या डोक्यावर वार केले. या हल्ल्यामुळे ते जमीनवर कोसळले. त्यांच्या डोक्याची कवटी फुटली होती आणि जिकडे तिकडे रक्त आणि डोक्याचे तुकडे पडलेले होते. त्यानंतर आरोपी कुऱ्हाड तिथेच सोडून पळून गेले.

दरम्यान, त्यांचा मुलगा तिथे पोहोचला आणि त्याने परमिंदर तिवारी यांना रक्ताच्या थारोळ्यात जमिनीवर पडलेले पाहिले. त्यांना तात्काळ माछीवारा सिव्हिल हॉस्पिटलमध्ये दाखल करण्यात आले. त्यांची प्रकृती गंभीर असल्याने डॉक्टरांनी त्यांना दुसऱ्या रुग्णालयात पाठवले. त्यानंतर तिवारी कुटुंबीयांनी त्यांना फोर्टिस हॉस्पिटलमध्ये नेले, मात्र उपचारादरम्यान त्यांचा मृत्यू झाला.

घटनेची माहिती मिळताच, कुमकलान पोलीस ठाण्यातील पोलीस घटनास्थळी दाखल झाले आणि त्यांनी तपास सुरू केला. पोलिसांच्या माहितीनुसार, या हल्ल्यात दोन अज्ञात व्यक्तींचा सहभाग होता. परमिंदर तिवारी यांच्या मुलाने सांगितले की, जेव्हा तो तिथे पोहोचला तेव्हा त्याचे वडील जमिनीवर पडलेले होते . कोणीतरी त्यांच्या डोक्यावर वार केला होता. प्रत्यक्षदर्शींनी सांगितले की, तिवारी नेहमीप्रमाणे घटनास्थळी आले असता दोन जणांनी त्यांच्या डोक्यात कुऱ्हाडीने हल्ला केला. हल्लेखोरांना यापूर्वी त्या परिसरात कधीही पाहिले गेले नसल्याने आम्ही त्यांना ओळखले नाही.

१०० नंबरवर फोन केला, पण कोणीच उत्तर दिले नाही

प्रत्यक्षदर्शीने सांगितले की, आम्ही हल्लेखोरांना नावाने ओळखत नव्हतो, पण ते दिसल्यास त्यांना ओळखू. त्याच्या म्हणण्यानुसार, ते दोन हल्लेखोर त्या परिसरात यापूर्वी कधीही दिसले नव्हते. आम्ही त्या हल्लेखोरांना तिवारींच्या डोक्यावर हल्ला करताना पाहिले. आम्ही त्यांना पकडण्याचा प्रयत्नही केला, पण हल्लेखोरांकडे कुऱ्हाडी होत्या आणि आमच्याकडे कुठलेही शस्त्र नसल्याने आम्ही हादरलो होतो. पण आम्ही तात्काळ १०० वर फोन केला, पण कोणीही फोन उचलला नाही. असे प्रत्यक्षदर्शींनी सांगितले.