जम्मू आणि काश्मीरच्या अनेक भागांमध्ये मुसळधार पाऊस कोसळतोय. मंगळवारी केंद्रशासित प्रदेशातील दोडा जिल्ह्यात अचानक ढगफुटी झाल्यानं पूर आला. त्यामुळे १० घरांचे नुकसान झाले आहे. अधिकाऱ्यांनी दिलेल्या माहितीनुसार, एकूण चार जणांचा मृत्यू झाला. पुरात घर कोसळल्यानं दोघांचा तर, पुरात वाहून गेल्यानं दोघांचा मृत्यू झाला आहे. परिसरात मदत आणि बचावकार्य सुरू आहे. मुसळधार पावसामुळे अनेक ठिकाणी भूस्खलनही झाले आहे.

केंद्रीय मंत्री जितेंद्र सिंह यांनी दुपारी एक्सवर पोस्ट शेअर केली. 'डोडा येथील डीसी हरविंदर सिंह यांच्याशी नुकतेच बोलणे झाले आहे. भालेसा येथील चारवा भागात अचानक पूर आला. आतापर्यंत या पुरामुळे जनजीवन विस्कळीत झाले आहे. प्रशासन परिस्थितीवर लक्ष ठेवून आहे', असं त्यांनी आपल्या पोस्टमध्ये म्हटलंय.

जम्मू आणि काश्मीरचे मुख्यमंत्री ओमर अब्दुल्ला यांनी आढावा बैठक घेतली. त्यांनी या आढावा बैठकीत प्रशासनाला सुचना दिल्या. मुख्यमंत्र्यांनी ट्विटर पोस्ट केली आहे. 'जम्मू प्रांतातील अनेक भागात परिस्थिती खूप गंभीर आहे. परिस्थितीचे निरिक्षण करण्यासाठी मी स्वत: जम्मूला जाईन. इतर गरजांसाठी उपायुक्तांना अतिरिक्त निधी देण्याच्या सूचना देण्यात आल्या आहेत'.

उपायु्क्त हरविंदर सिंग यांनी एएनआय या वृत्तसंस्थेला सांगितले की, 'तीन दिवसांपासून सतत पाऊस पडत आहे. विशेषत: चिनाब नदीच्या परिसरात. दोन ठिकाणांहून ढगफूटीचं वृत्त समोर आलं आहे. पावसामुळे जनजीवन विस्कळीत झालं आहे. गोठ्यांचं नुकसान झालं आहे. खासगी आरोग्य केंद्राचेही नुकसान झालंय. तीन पादचारी पूल वाहून गेले आहेत. लोकांना सुरक्षित ठिकाणी हलवण्याचे सुरू आहे'. या ढगफूटीमुळे झालेल्या नुकसानामुळे वैष्णो देवी यात्रा थांबवण्यात आली आहे.