Chhattisgarh Vedanta Power Plant 10 Dies छत्तीसगडमधून मोठी बातमी समोर आली आहे. शक्ती जिल्ह्यातील वेदांता पॉवर प्लांटमध्ये बॉयलरचा स्फोट होऊन कंपनीतील १० जणांचा मृत्यू झाला असून या दुर्घटनेत तीस ते चाळीस कामगार गंभीररित्या भाजले असल्याचे वृत्त समोर आले आहे. जखमींना जवळच्या रुग्णालयात उपचारांसाठी दाखल करण्यात आले आहे.सध्या रेस्क्यू ऑपरेशन सुरु असून मृतांची संख्या वाढण्याची शक्यता वर्तवण्यात आली आहे.

मिळालेल्या माहितीनुसार, सिंघितराई येथील वेदांता पॉवर प्लांटमध्ये नेहमीप्रमाणे कामगार काम करत होते. काम सुरु असताना अचानक दुपारी २ वाजण्याच्या सुमारास पॉवर प्लांटमधील बॉयलरचा स्फोट झाला. या दुर्घटनेत १० जणांचा मृत्यू झाला असून ४० जण गंभीर जखमी झाले आहेत. घटनेची माहिती मिळताच पोलीस, अग्निशमन दल आणि प्रशासकीय अधिकारी घटनास्थळी दाखल झाले.

जखमींना खर्सिया येथील पद्मावती रुग्णालयात दाखल करण्यात आले आहे. दुर्घटनेत अडकलेल्या कामगारांच्या कुटुंबीयायांनी कारखान्याबाहेर गर्दी केली असून अतिरिक्त कोणताही अनुचित प्रकार घडू नये यासाठी पोलीस अधीक्षकांसह मोठा पोलीस बंदोबस्त घटनास्थळी तैनात करण्यात आला आहे. शक्तीचे जिल्हाधिकारी अमृत विकास तोपनो हे देखील कारखान्यात दाखल झाले आहेत.

मुख्यमंत्री विष्णुदेव साई यांनी सोशल मीडियावर पोस्ट करत या घटनेबद्दल दुःख व्यक्त केले असून दोषींवर कठोर कारवाई केली जाईल, असे म्हटले आहे. दरम्यान अद्यापही अग्निशमन दल आणि प्रशासकीय अधिकारी घटनास्थळी रेस्क्यू ऑपरेशन करत असून मृतांची संख्या वाढण्याची शक्यता वर्तवण्यात आली आहे. या दुर्घटनेत मृत झालेल्या कामगारांवर दुःखाचा डोंगर कोसळला असून परिसरातून हळहळ व्यक्त केली जात आहे.