गणेश शिंगाडे,साम टीव्ही

बिजापूर: छत्तीसगडच्या बिजापूर-दंतेवाडा सीमावर्ती भागात सुरक्षा दल आणि नक्षलवाद्यांमध्ये भीषण चकमक सुरू असल्याची माहिती मिळत आहे. गेल्या दोन तासांपासून ही चकमक सुरु आहे. या चकमकीत १२ माओवादी ठार झाले आहेत. तर सुरक्षा दलाचे ३ जवान शहीद झाले आहेत. बिजापूरचे एसपी जितेंद्र यादव यांनी याविषयी माहिती दिली.

बिजापुरात गेल्या काही तासांपासून सुरक्षा दलाचं माओवाद्याविरोधात अभियान सुरु आहे. बीजापूर-दंतेवाड्याच्या सीमेवर सुरू असलेल्या चकमकीत १२ नक्षलवाद्यांचा खात्मा करण्यास सुरक्षा दलाच्या जवानांना यश आलं.

प्राथमिक माहितीनुसार या चकमकीत तीन सैनिक शहीद झाले आहेत. तर दोनहून अधिक जण जखमी झाले आहेत. जखमी सैनिकांना सुरक्षित ठिकाणी नेण्यात येत आहे. तसेच त्यांच्यावर तातडीने वैद्यकीय उपचार करण्यात येत आहे.

नेमकी कुठे सुरु आहे चकमक?

संवेदनशील नक्षलवादी क्षेत्र मानल्या जाणाऱ्या बिजापूरच्या गंगलूर भागात ही चकमक सुरू आहे. अधिकाऱ्यांचे म्हणणे आहे की, सुरक्षा दलांनी या भागात मोठ्या संख्येने नक्षलवाद्यांना वेढा घातला आहे. त्यामुळे ठार झालेल्या नक्षलवाद्यांचा आकडा आणखी वाढू शकतो.

आतापर्यंत किती माओवादी ठार?

पीटीआयच्या अधिकाऱ्यांनी दिलेल्या माहितीनुसार, छत्तीसगडमध्ये २०२५ सालात झालेल्या चकमकीत मारल्या गेलेल्या २७५ माओवाद्यांचा खात्मा करण्यात आला आहे. त्यातील २४६ माओवादी हे बीजापूरसहित सात जिल्ह्यात मारले गेले. तर २७ नक्षलवाद्यांचा रायपूरमध्ये खात्मा करण्यात आला. तर दुर्ग भागात दोन नक्षलवाद्यांचा खात्मा करण्यात आला होता.