Tamilnadu Chennai LPG Cylinder Blast 2 Child Dead चेन्नईमध्ये आज सकाळच्या सुमारास एलपीजी सिलेंडरच्या भीषण स्फोटात दोन मुलांचा होरपळून मृत्यू झाला असून सात जण गंभीर भाजले आहेत. ही घटना सकाळी ७:४० च्या सुमारास चेन्नई दक्षिणच्या ओएमआर परिसरातील नवलूरमधील चामुंडेश्वर नगर येथे घडली आहे. या दुर्घटनेत घरांचेही नुकसान झाले आहे. तामिळनाडू पोलिस आणि अग्निशमन दलाचे कर्मचारी घटनास्थळी पोहोचले असून बचाव कार्य सुरू केले आहे.

एएनआयने दिलेल्या वृत्तानुसार, चेन्नई दक्षिणच्या ओएमआर परिसरातील नवलूरमधील चामुंडेश्वर नगर, तिसऱ्या स्ट्रीटमध्ये एका घरात सिलिंडरचा भीषण स्फोट झाला. तीन घरे बाजूबाजूला लागून असल्याने तिन्ही घरांना आगीने वेढा घातला होता.

आज रविवार सुट्टी असल्याने घरात सगळेच उपस्थित होते. याच वेळेस स्फोट झाल्याने मोठी दुर्घटना घडली. या आगीत एकाच कुटुंबातील दोन भावंडांचा मृत्यू झाला. तसेच ७ जण गंभीर जखमी झाले आहेत. हा स्फोट इतका भीषण होता की, तिन्ही घरे कोसळली. या ढिगाऱ्याखाली अनेकजण अडकले. स्फोटाचा आवाज ऐकून आजूबाजूच्या नागरिकांनी घटनास्थळी धाव घेतली.

त्यांनी तात्काळ पोलिस आणि अग्निशमन विभागाला माहिती दिली. थझांबूर पोलिस स्टेशन आणि अग्निशमन दलाचे कर्मचारी घटनास्थळी पोहोचले आणि बचाव कार्य हाती घेतले. या दुर्घटनेतील जखमींना उपचारासाठी जवळच्या रुग्णालयात दाखल केले आहे. पोलिसांनी घटनेचा तपास सुरू केला आहे.