केंद्र सरकारने दोन नवीन विमान कंपन्यांना उड्डाणाची तयारी सुरू करण्याची परवानगी दिलीय. या निर्णयामुळे भारतातील विमान वाहतूक क्षेत्रात प्रवाशांना अधिक पर्याय मिळू शकतील. लवकरच नवीन दोन एअरलाईन्सची विमान सेवा सुरू होणार आहे. विमान वाहतूक क्षेत्राला चालना देण्याच्या उद्देशाने केंद्र सरकारने मोठा निर्णय घेतलाय.

दरम्यान काही दिवसांपूर्वी संपूर्ण भारतात इंडिगो विमानाच्या कारभारामुळे गोंधळ उडाला होता. त्यामुळे हवाई प्रवासाची अभूतपूर्व कोंडी झाली होती. सध्या अस्तित्त्वात असलेल्या कंपन्यांवरील अवलंबित्व कमी करण्याचा प्रयत्न सरकारकडून केला जात असल्याचं दिसत आहे. त्याचमुळे केंद्र सरकारने दोन नव्या कंपन्यांना मान्यता दिलीय. अल हिंद एअर आणि फ्लाय एक्सप्रेसला या आठवड्यात नागरी विमान वाहतूक मंत्रालयाकडून ना हरकत प्रमाणपत्र मिळालंय.

केंद्रीय नागरी विमान वाहतूक मंत्री राम मोहन नायडू यांनी याबाबतची माहिती सोशल मीडिया प्लॅटफॉर्म एक्सवर शेअर केलीय. मागच्या आठवड्यात विमान वाहतूक क्षेत्रात प्रवेश करू पाहणाऱ्या अल हिंद एअर आणि फ्लाय एक्सप्रेस या दोन नवीन कंपन्यांच्या शिष्टमंडळानं त्यांची भेट घेतली होती.

दरम्यान देशातील सर्वात मोठी एअरलाईन असलेल्या इंडिगोच्या व्यवस्थपनात विस्कळीतपणा झाल्याचे पाहायला मिळाले होते. यामुळे संपूर्ण देशाची विमानसेवांवर परिणाम झाला होता. हजारो प्रवाशांना तासन्‌तास विमानतळांवर थांबावे लागले होते. या घटनेमुळे भारतीय विमानवाहतूक क्षेत्रात मोजक्या कंपन्यांचे वर्चस्व असणं धोकादायक ठरू शकते, यामुळे या पार्श्वभूमीवर सरकारने हा महत्त्वाचा निर्णय घेतलाय.

केरळमधील अलहिंद समूहाकडून अल हिंद एअर ही कंपनी हाताळली जातेय. अलहिंद ही पूर्वीपासूनच ट्रॅव्हल आणि इतर संबंधित क्षेत्रात कार्यरत आहे. तर फ्लाय एक्सप्रेस ही कंपनी हैदराबादमध्ये स्थित असून या कंपनीला कुरिअर आणि कार्गो सेवांचा अनुभव आहे. याशिवाय शंख एअर कंपनीला आधीच ना हरकत प्रमाणपत्र मिळालेले आहे. २०२६ पासून या कंपनीच्या विमानांचे उड्डाण सुरू होईल, अशी शक्यता वर्तवली जात आहे.