jeuCBI Summons Arvind Kejriwal : दिल्लीतील कथित मद्य अबकारी धोरण घोटाळा प्रकरणाची चौकशी आता दिल्लीचे मुख्यमंत्री अरविंद केजरीवालपर्यंत जाऊन पोहोचली आहे.

या प्रकरणात सीबीआयने आता आम आदमी पक्षाचे संयोजक आणि दिल्लीचे मुख्यमंत्री अरविंद केजरीवाल यांना समन्स पाठवले आहे. १६ एप्रिल रोजी त्यांना चौकशीसाठी हजर राहण्यास सांगितले आहे. (Latest News Update)

सीबीआयने अरविंद केजरीवाल यांना चौकशीसाठी बोलावल्यानंतर आम आदमी पक्षाचे नेते संजय सिंह यांनी ट्विट केले आहे. अत्याचाराचा अंत नक्कीच होईल, असे त्यांनी ट्विटमध्ये म्हटलं आहे.

दिल्लीतील अबकारी धोरणात घोटाळा झाल्याच्या आरोपाखाली दिल्लीचे माजी उपमुख्यमंत्री मनीष सिसोदिया सध्या तुरुंगात आहेत. सिसोदिया यांना केंद्रीय अन्वेषण विभागाने (सीबीआय) २६ फेब्रुवारी रोजी अटक केली होती. सिसोदिया यांची तुरुंगातच ईडीनेही चौकशी केली होती.

ईडीने मनीष सिसोदिया यांची चौकशी केल्यानंतर त्यांना अटक केली होती. ईडीने कोठडी घेऊन चौकशीही केली होती. सिसोदिया यांनी याच प्रकरणात राउज एव्हेन्यू कोर्टात याचिका दाखल करून जामिनाची मागणी केली होती. मात्र, कोर्टाने त्यांना जामीन मंजूर केला नाही.

काय आहे प्रकरण?

दिल्ली सरकारने १७ नोव्हेंबर २०२१ रोजी नवे अबकारी धोरण लागू केले होते. दिल्ली सरकारने हे धोरण लागू केल्यानंतर महसूलात वाढ होऊन माफिया राज संपल्याचा दावा केला होता. मात्र, त्याउलट घडले. दिल्ली सरकारच्या महसूलात घट झाली.

दिल्लीच्या तत्कालीन मुख्य सचिवांनी जुलै २०२२ रोजी दिल्लीचे नायब राज्यपाल व्ही. के. सक्सेना यांना अहवाल पाठवला होता. त्यात मनीष सिसोदिया यांच्यावर मद्य व्यावसायिकांना अतिरिक्त फायदा मिळवून दिल्याचा आरोप करण्यात आला होता.