Karnataka Factory Blast Latest News

कर्नाटकातील एका फटाक्यांच्या कारखान्यात रविवारी (२८ जानेवारी) दुपारच्या सुमारास भीषण स्फोट झाला. या स्फोटात तीन कामगारांचा जागीच मृत्यू झाला असून अनेकजण जखमी झाले आहेत. जखमींपैकी काहींची प्रकृती चिंताजनक आहे. त्यांना उपचारासाठी रुग्णालयात दाखल करण्यात आलं आहे. मृतांचा आकडा वाढण्याची शक्यता आहे.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

वर्गीस (वय ६२), स्वामी (वय ६०) आणि चेतन (वय २४) अशी मृतांची नावे आहेत. याप्रकरणी पोलिसांनी तातडीने गुन्हा दाखल करत घटनेचा तपास सुरू केला आहे. पोलिसांनी दिलेल्या माहितीनुसार, दक्षिण कर्नाटकातील बेलतंगडी परिसरातील कुक्कडी गावात फटाक्यांचा कारखाना आहे. (Latest Marathi News)

रविवारी या कारखान्यात कामगार काम करीत होते. दरम्यान, अचानक कारखान्यात भीषण स्फोट झाला. या स्फोटाची तीव्रता इतकी होती, की जवळपास ४ किलोमीटपर्यंत परिसर हादरला. स्फोटामुळे कारखान्याला भीषण आग लागली.

स्थानिकांनी ही आग विझवण्याचा प्रयत्न केला. मात्र, क्षणार्धात आगीने संपूर्ण कारखान्याला विळखा घातला. घटनेची माहिती मिळताच पोलिसांसह अग्निशमन दलाच्या जवानांनी घटनास्थळी धाव घेतली. अथक प्रयत्नानंतर आग आटोक्यात आली.

मात्र, या घटनेत कारखान्यात काम करणाऱ्या तिघांचा होरपळून मृत्यू झाला. तर अनेकजण जखमी झाले. नेमका हा स्फोट कशामुळे झाला? याचे कारण अद्यापही समोर आलेले नाही. याप्रकरणी पोलिसांनी तातडीने गुन्हा दाखल करत घटनेचा शोध सुरू केला आहे.