Dhanbad Coal Mine Collapse Updates : झारखंडमधील धनबादनजीक एका कोळशाच्या खाणीत भीषण दुर्घटना घडली. खाणीत अवैधपणे खोदकाम सुरू असतानाच, ढिगारा कोसळला. या ढिगाऱ्याखाली दबून तीन जणांचा मृत्यू झाला. तर अनेक जण ढिगाऱ्याखाली दबल्याची भीती व्यक्त केली जात आहे. (Latest Marathi News)

झारखंडमधील (Jharkhand) धनबादजवळील भोवरा कोलियरी परिसरात शुक्रवारी ही दुर्घटना घडली. अधिकाऱ्यांच्या माहितीनुसार, कोळशाच्या खाणीत खोदकाम सुरू असताना ही घटना घडली. अवैधपणे खोदकाम सुरू असताना ढिगारा कोसळला. त्याखाली दबून तिघांचा मृत्यू झाला. तर अनेक जण ढिगाऱ्याखाली दबल्याची भीती व्यक्त केली जात आहे.

धनबादपासून २१ किलोमीटरवर असलेल्या बीसीसीएलच्या भोवरा कोलियरी परिसरात शुक्रवारी सकाळी साडेदहा वाजताच्या सुमारास ही घटना घडली. अधिकाऱ्यांनी या घटनेची अधिकृत माहिती दिली. या खाणीत अवैधपणे खोदकाम सुरू होते, अशी माहिती समजते.

वरिष्ठ पोलीस अधिकाऱ्याने दिलेल्या माहितीनुसार, या दुर्घटनेत किती जण मरण पावले किंवा ढिगाऱ्याखाली किती जण दबले आहेत हे नेमकेपणाने सांगता येणार नाही. बचाव आणि मदतकार्य यशस्वीरित्या पूर्ण झाल्यानंतरच नेमकी आकडेवारी सांगता येणार आहे.

काही प्रत्यक्षदर्शींनी या घटनेबाबत सविस्तर माहिती दिली. ही कोळसा खाण अवैध असून, तिथं खोदकाम सुरू असताना ढिगारा कोसळला. त्याखाली अनेक जण दबले गेले आहेत. बरेच मजूर हे स्थानिक असल्याचे त्यांचे म्हणणे आहे.

घटनेनंतर स्थानिक मदतीसाठी धावून गेले. त्यांनी ढिगाऱ्याखालून तिघांना बाहेर काढले. त्यांना तातडीने रुग्णालयात दाखल केले. डॉक्टरांनी तपासून त्या तिघांनाही मृत घोषित केले, अशी माहितीही प्रत्यक्षदर्शींनी दिली. कोळसा खाणीत अडकलेल्या मजुरांना बाहेर काढण्याचे काम सुरू आहे, अशी माहिती पोलिसांनी दिली.