भाजप आमदार हरीश खुराना यांच्या अडचणीत वाढ होण्याची शक्यता आहे. दिल्लीतील मोती नगर येथील आचार्य श्री भिक्षू रूग्णालयात आपत्कालीन ड्युटीवर तैनात असलेल्या प्रशिक्षणार्थी डॉक्टरवर हल्ला झाल्याची घटना गुरूवारी उघडकीस आली. डॉक्टरने रूग्णालय प्रशासनाकडे याबाबत तक्रार दाखल केली. हरीश खुराना आणि त्यांच्या समर्थकांवर डॉक्टरासोबत गैरवर्तन केल्याचा आरोप आहे.

फेडरेशन ऑफ ऑल इंडिया रेसिडेंट डॉक्टर्स असोसिएशन, AIIMS रेसिडेंट डॉक्टर्स असोसिएशन आणि लेडी हार्डिंग मेडिकल कॉलेजच्या आरडीए यांनीही या प्रकरणात कायदेशीर कारवाई करण्याची आणि रूग्णालयात सुरक्षा वाढवण्याची मागणी केली आहे.

प्रशिक्षणार्थी डॉक्टरांनी दिलेल्या माहितीनुसार, 'सकाळी ११: १५ च्या सुमारास, चार ते पाच लोक १० वर्षांच्या मुलाला दवाखान्यात घेऊन आले. ते थेट आपत्कालीन कक्षात आले होते. त्या मुलाच्या हाताच्या बोटाला दुखापत झाली होती. त्यांनी जलद उपचारांसाठी दबाव आणण्यास सुरूवात केली. प्रशिक्षणार्थी डॉक्टर आणि इतर निवासी डॉक्टर दुसऱ्या रूग्णाला चेक करत होते. म्हणून त्यांना थोडावेळ थांबण्यास सांगितले'.

'त्यावेळी त्या लोकांनी गैरवर्तन करण्यास सुरूवात केली', अशी माहिती प्रशिक्षणार्थी डॉक्टरांनी दिली. या हल्ल्यात भाजप आमदार हरीश खुराना यांचा सहभाग असल्याची चर्चा आहे. भाजप आमदाराद्वारे आचार्य भिक्षू सरकारी रूग्णालयात डॉक्टरवर हल्ला करण्यात आला होता. दरम्यान, या प्रकरणात एफआयआर नोंदवण्याची मागणी करण्यात येत आहे.

या घटनेनंतर आप पक्षाचे दिल्ली राज्य संयोजक सौरभ भारद्वाज यांनी आरोप केला की, भाजप आमदाराने बुधवारी डॉक्टरवर हल्ला केला होता. परंतु दिल्ली पोलीस गुन्हा नोंदवण्यास टाळाटाळ करीत होती.