खड्ड्यांमुळे डॉक्टरचा मृत्यू; स्कूटीसह खाली पडले, ट्रकनं चिरडलं, नेमकं घडलं काय?

भिंवडी शहरातून एक धक्कादायक बातमी समोर येत आहे. रस्त्यावरील खड्ड्यांमुळे डॉक्टरचा अपघाती मृत्यू झाला आहे. स्कूटी चालवत असताना डॉक्टरचा तोल गेला. नंतर ते रस्त्यावर पडले. त्याचवेळी मागून येणाऱ्या ट्रकनं त्यांना चिरडले. ते ट्रकखाली आल्यामुळे त्यांचा जागीच मृत्यू झाला. या घटनेनंतर स्थानिकांनी रोष व्यक्त केला.

नसीम अन्सारी असे डॉक्टरचे नाव आहे. ते भिवंडी शहरातील रहिवासी होते. घटनेच्या दिवशी ते भिवंडी‌ शहरातील वंजारपट्टी नाका येथून सिराज हॉस्पिटलजवळून जात होते. या दरम्यान, त्यांचा भीषण रस्ता अपघात घडला. डॉक्टर नसीम अन्सारी हे अॅक्टिव्हा स्कूटीवरून जात होते. रस्त्यावर प्रचंड खड्डे आणि चिखलचं साम्राज्य होतं.

खड्ड्यातून वाट काढत जात होते. मात्र, तोल गेला आणि स्कूटीसह खाली पडले. यादरम्यान, त्यांच्या स्कूटीच्या मागून एक ट्रक येत होता. ट्रकचं चाक त्यांच्या अंगावरून गेलं. ट्रकच्या टायरखाली आल्याने ते चिरडले गेले. या भीषण अपघातात त्यांचा जागीच मृत्यू झाला. घटनेनंतर ट्रक ड्रायव्हर पसार झाला. स्थानिक लोकांनी घटनास्थळी धाव घेतली.

तसेच डॉक्टर नसीम अन्सारी यांचा जीव वाचवण्याचा प्रयत्न केला. त्यांना तातडीने रूग्णालयात नेण्यात आले. मात्र, डॉक्टरांनी त्यांना मृत घोषित केले. या घटनेनंतर संतप्त नागरिकांनी रस्ता रोखून गोंधळ घातला. मात्र, पोलिसांनी घटनास्थळी पोहोचून लोकांना समजावलं. तसेच  जमाव हटवून परिस्थिती नियंत्रणात आणली. या घटनेनंतर अन्सारी कुटुंबावर दुखा:चा डोंगर कोसळला असून, पुढील तपास पोलिसांकडून सुरू आहे.