उत्तर प्रदेश: वाराणसीच्या सिद्धगिरी बाग परिसरात शुक्रवारी रात्री भाजप नेते सुनील शर्मा उर्फ मुशी यांनी गळफास घेऊन जीवन संपवले. ते काशी विश्वनाथ मंडळाचे उपाध्यक्ष होते. पोस्टमार्टमनंतर लक्सा पोलिसांनी त्यांचा मृतदेह कुटुंबियांच्या ताब्यात दिला. प्रथमदर्शनी या घटनेमागे कौटुंबिक कारणे असण्याची शक्यता पोलिसांकडून व्यक्त करण्यात आली आहे. या घटनेनंतर कुटुंबावर दु:खाचा डोंगर कोसळला आहे.

मिळालेल्या माहितीनुसार, काशी विश्वनाथ गल्लीत मान मंदिराजवळ राहणाऱ्या सुनील शर्मा यांनी 2015 मध्ये घटस्फोटीत महिलेशी प्रेमविवाह केला होता. लग्नानंतर ते पत्नी आणि तिच्या दोन मुलीसह सिद्धगिरी बाग येथील भाड्याच्या घरात राहत होते. विश्वनाथ गल्लीत त्यांचे खेळण्यांचे दुकान होते. तसेच ते साडीचा व्यवसाय करत होते.

शुक्रवारी रात्री त्यांनी गळफास घेऊन जीवन संपवले. शनिवारी सकाळी स्थानिक नागरिकांनी या घटनेची माहिती पोलिसांना दिली. त्यानंतर पोलिसांनी घटनास्थळी दाखल होत मृतदेह ताब्यात घेतला आणि पोस्टमार्टमसाठी पाठवला. पोलिसांनी सांगितले की, सुनील शर्मा यांनी आत्महत्या नेमक्या कोणत्या कारणामुळे केली, हे अद्याप स्पष्ट झालेले नाही. पोस्टमार्टम करण्यात आले असून आत्महत्येच्या कारणांचा तपास केला जात आहे. मात्र, प्राथमिक तपासात कौटुंबिक कारणांचा संशय व्यक्त करण्यात आला आहे. कुटुंबीयांशी चर्चा केल्यानंतर अधिक माहिती समोर येण्याची शक्यता आहे.

दरम्यान, भाजप कार्यकर्त्यांनी त्यांच्या घरी जाऊन कुटुंबीयांचे सांत्वन केले. या प्रकरणाचा पुढील तपास पोलिसांकडून सुरू आहे.