नीट पेपर फुटी प्रकरणाने संपूर्ण देशात खळबळ उडाली आहे. या पेपर फुटी प्रकरणी महाराष्ट्रातील विविध जिल्ह्यातून संशियतांना अटक केली जात आहे. या प्रकरणातील पहिल्या संशयित आरोपीला नाशिकमधून अटक करण्यात आली. आता राजस्थानमधून एकाला अटक करण्यात आली आहे. पोलिसांनी आरोपी दिनेश बिंवाल याला अटक केली आहे. दिनेश हा भाजप नेता असल्याचा आरोप काँग्रेस नेते, माजी मुख्यमंत्री अशोक गहलोत यांनीही केला आहे. या आरोपावर भाजपने कोणतीही प्रतिक्रिया दिलेली नाही.

काँग्रेसने दिनेश बिंवाल आणि भाजपचे पोस्टर शेअर केले आहेत. काँग्रेसने सोशल मीडियावर केलेल्या पोस्टच्या कॅप्शनमध्ये लिहिलं की, 'दिनेश बिंवाल भाजप नेता आहे. भाजप नेता दिनेश पेपर लीक माफिया आहे. या प्रकरणात त्याचा हात आहे. दिनेशने आधी ३० लाखात NEET 2026 चा पेपर खरेदी केला. त्यानंतर त्याने पेपर लाखो रुपयांमध्ये विकला. पुढे सोशल मीडियाच्या विविध ग्रुपमध्ये फॉरवर्ड केला.

'दिनेशने भाजपच्या संरक्षणात लाखो विद्यार्थ्यांचे भविष्य उद्ध्वस्त केले.ही पहिली घटना नाही. भाजप सरकारच्या काळात पेपर फुटी माफियाने लाखो कुटुंबीयांचे आयुष्य उद्ध्वस्त केले. भाजप सरकार हे पेपर फुटी माफियाचे भागीदार आहे, असा आरोप काँग्रेसने केला. राजस्थानचे माजी मुख्यमंत्री अशोक गहलोत यांनी भाजपवर गंभीर आरोप केला. 'बिंवाल हा भाजप पदाधिकारी आहे. यामुळे पेपर लीक प्रकरण दडपण्याचा प्रयत्न झाल्याचा आरोप गहलोत यांनी केला.

गहलोत यांनी म्हटलं की, नीट पेपर लीक प्रकरणात अटक करण्यात आलेला दिनेश बिंवाल हा भाजप पदाधिकारी आहे. यामुळे राजस्थानच्या भाजप सरकारने नीट पेपर फुटी प्रकरण दडपण्याचा प्रयत्न केला. यात प्रकरणात FIR देखील नोंदवण्यात आलेला नाही. मी ११ मे रोजी पासून FIR दाखल करण्यात येत नसल्याचे म्हणतोय. भाजपची पोलखोल झाली आहे. भाजप सरकार युवकांच्या भविष्यांशी खेळत असून पेपर लीक माफियाला अभय देत आहे'.

नीट पेपर लीक प्रकरणात जयपूरच्या जामवा रामगढ येथून दिनेश आणि त्याचा भाऊ मांगीलाल याला ताब्यात घेण्यात आलं आहे. दिनेश हा भाजप नेता असल्याचा काँग्रेसचा दावा आहे. अशोक गहलोत यांनी त्याच्याशी संबंधित एक पोस्टर देखील शेअर केलं आहे. या पोस्टरमध्ये दिनेश हा भाजयुमो जिल्हा मंत्री, जयपूर देहात असल्याचे लिहिलं आहे.