Madhya Pradesh Bhopal News :

मध्य प्रदेशातील भोपाळमध्ये एक भीतीदायक घटना घडली आहे. घरी जात असलेल्या एका तरुणावर वाघाने हल्ला केला. या हल्ल्यातून तरूण थोडक्यात बचावला. वाघापासून बचाव करण्यासाठी तरुणानं एका झाडाचा आधार घेतला. अख्खी रात्र त्यानं झाडावर बसून काढली.

ही घटना मध्य प्रदेशातील उमरिया जिल्ह्यातील मुदगुरी घघादर गावातील बांधवगड व्याघ्र प्रकल्पाच्या धामोखर बफर झोनमध्ये घडली.

उमारिया येथील धवडा कॉलनीतील रहिवासी कमलेश सिंगवर वाघाने हल्ला केला. घरी परत जात असताना कमलेशसोबत ही भयानक घटना घडली.

कमलेश सिंग उमारियाच्या दिशेने जात असताना जंगलात हा प्रकार घडला. संध्याकाळच्या वेळी कमलेश रानडुक्करांचा पाठलाग करत होता. त्यावेळी त्याच्यासमोर अचानक वाघ आला. कमलेश प्रचंड घाबरला. त्याने पळून जाण्याचा प्रयत्न केला, असे अधिकाऱ्यांनी सांगितले.

वाघाने कमलेशवर हल्ला केला. यात वाघाच्या पंजामुळे कमलेशला दुखापत झाली. त्याने स्वतःला वाचवण्यासाठी झाडाचा आधार घेतला. तो झाडावर चढला. वाघ खाली असल्याने तो रात्रभर झाडाला चिकटून राहिला.

रात्री अंधारात त्याला काहीच दिसत नव्हते. एवढ्या रात्री त्याला मदत मिळण्याची कोणतीच चिन्हे दिसत नव्हती. त्यामुळे तो रात्रभर झाडावर बसून राहिला. बचावासाठी कोणीतरी येईल, अशी आशा त्याला होती. तो जीव मुठीत धरून झाडावरच बसला होता.

उजाडल्यानंतर गावकऱ्यांनी कमलेशला शोधून काढले. त्याला झाडावरून खाली उतरवले. त्यानंतर वैद्यकीय उपचारासाठी त्याला जिल्हा रुग्णालयात दाखल करण्यात आले. कमलेश सिंग रुग्णालयात असताना त्याने घडलेल्या संपूर्ण प्रकाराची माहिती दिली. वाघाच्या पंजामुळे त्याच्या मांडीला दुखापत झाल्याचे त्याने सांगितले.