निवारी जिल्ह्यातील राजपुरा गावात एका अवैध प्रेमसंबंधातून आलेल्या क्रूर हत्येच्या घटनेने संपूर्ण परिसर हादरून गेला आहे. विवाहित प्रेयसीने लग्नासाठी वारंवार दबाव आणल्यानंतर आरोपीने तिला निर्दयीपणे ठार मारून मृतदेह स्वतःच्या घरात पुरला. ही घटना ओरछा पोलीस स्टेशन अंतर्गत घडली असून आरोपीचा तपास आणि शोध अद्याप सुरू आहे.

पोलिसांच्या माहितीनुसार, आरोपी रतिराम राजूपतचा लग्नापूर्वीच एका विवाहित महिलेबरोबर प्रेमसंबंध होता. जो लग्नानंतरही सुरु राहिला. या दरम्यान दोघांमध्ये शारीरिक संबंध निर्माण झाले होते. मात्र, महिलेने आपल्या पतीला सोडून रतीरामशी लग्न करण्याचा निर्णय घेत वारंवार दबाव टाकू लागल्याने आरोपी अस्वस्थ झाला. तणाव वाढत गेल्यानंतर रतीरामने आपल्या मित्रांसह तिच्या हत्येचा कट रचला.

२ ऑक्टोबरच्या रात्री, आरोपीने आपल्या प्रेयसीला घरी बोलावले. कारण तो त्या दिवशी एकटा होता. रात्री दोघांमध्ये पुन्हा शारीरिक संबंध झाले. पण त्याचवेळी रतीरामने तिचा गळा दाबून खून केला. त्यानंतर मित्र कालीचरण, मुकेश आणि ज्ञान सिंह यांच्या मदतीने घराच्या मातीच्या फरश्याखाली खोल खड्डा खोदून मृतदेह पुरण्यात आला. पुरलेल्या जागेला माती आणि शेणाने लेपून सामान्य स्थितीत आणले गेले, त्यावर पलंग टाकण्यात आला आणि आरोपी दोन दिवस त्याच ठिकाणी झोपत राहिला.

महिलेच्या बेपत्ता होण्याने तिच्या कुटुंबाचा संशय वाढला आणि त्यांनी पोलिसांकडे तक्रार दाखल केली. पोलिसांनी मोबाईल कॉल डिटेल्सच्या आधारे रतीरामला ताब्यात घेतले. चौकशीत त्याने गुन्ह्याची कबुली दिल्यानंतर मृतदेह बाहेर काढण्यात आला आणि त्याला अटक करण्यात आली.

पोलिस अधीक्षक डॉ. रायसिंह नरवारिया यांनी सांगितले की, आरोपीने बलात्कार करून निर्दयीपणे हत्या केली आणि मृतदेह घरात पुरला. मात्र, आरोपी पोलिस कोठडीत असताना शौचालयात जाण्याच्या बहाण्याने ठाण्यातून फरार झाला. निष्काळजीपणाबद्दल दोन पोलिस कर्मचाऱ्यांना निलंबित करण्यात आले असून, सध्या फरार आरोपी आणि त्याच्या मित्रांचा शोध सुरू आहे.