Summary -

• ४५ वर्षीय सॉफ्टवेअर इंजिनिअरची आत्महत्या

• जमीन वादातून नैराश्येत येत केली आत्महत्या

• १० पानांच्या सुसाईड नोटमध्ये लिहिली अनेकांची नावं

• याप्रकरणी पोलिसांनी दोघांना केली अटक

कर्नाटकची राजधानी बंगळुरूमधून एक धक्कादायक घटना समोर आली आहे. याठिकाणी एका ४५ वर्षीय सॉफ्टवेअर इंजिनिअरने आत्महत्या केली. मुरली गोविंद राजू असं आत्महत्या केलेल्या इंजिनिअरचे नाव होते. आत्महत्या करण्यापूर्वी त्याने १० पानांची सुसाईड नोट लिहिली आणि त्यामध्ये नातेवाईकांनी एका जमीन खरेदी प्रकरणात फसवल्याचा आरोप केला. या इंजिनिअरने जमीन खरेदी केलेल्या जागेवरच गळफास घेत आयुष्य संपवले. या घटनेमुळे कर्नाटकमध्ये खळबळ उडाली आहे.

आत्महत्या करण्यापूर्वी मुरली गोविंद राजू या इंजिनिअरने १० पानांची एक सुसाईड नोट लिहिली होती. ज्यामध्ये त्याने त्यांच्या मृत्यूसाठी काही लोकांना जबाबदार धरले. या नोटमध्ये त्याने एका कुटुंबावर आणि बंगळुरू महानगरपालिकेच्या माजी बीबीएमपीच्या अधिकाऱ्यांवर गंभीर आरोप केले आहेत. २०१८ मध्ये गोविंद राजूने बंगळुरूच्या व्हाइटफील्ड परिसरात जमीन खरेदी केली होती. ही जमीन त्याला शशी नंबियार आणि उषा नंबियार नावाच्या एका जोडप्याने एका नातेवाईकामार्फत दिली होती.

गेली अनेक वर्षे सर्व काही सुरळीत चालले होते पण जेव्हा गोविंद राजूने या जमिनीवर घर बांधायला सुरुवात केली तेव्हा परिस्थिती बिघडू लागली. सुसाईड नोटमध्ये गोविंद राजूने लिहिले की, त्याने बांधकाम सुरू करताच शशी आणि त्यांची बायको उषा त्याला त्रास देऊ लागली. त्याच्यावर महानगरपालिकेच्या नियमांचे उल्लंघन केल्याचा आरोप केला. शशीने काही जीबीए/बीबीएमपी अधिकाऱ्यांशी संगनमत करून त्याला त्रास देणे सुरू ठेवले. शशीने वाद मिटवण्यासाठी २० लाख रुपये मागितले होते. ही रकम देण्याची अंतिम मुदत सोमवार दिली होती.

गोविंद राजू सोमवारी सकाळी ६ वाजताच्या सुमारास घराबाहेर पडला. त्यानंतर तो थेट बांधकाम सुरू असलेल्या घरात गेला आणि तिथेच त्याने गळफास घेत आयुष्य संपवलं. या घटनेनंतर गोविंद राजूच्या आईने पोलिस ठाण्यात धाव घेत तक्रार दाखल केली. तक्रारीच्या आधारे पोलिसांनी शशी नंबियार आणि त्याची बायको उषा यांच्याविरुद्ध गुन्हा दाखल करून त्यांना अटक केली. न्यायालयाने त्यांना १४ दिवसांच्या न्यायालयीन कोठडीत पाठवले आहे. या प्रकरणात आरोपींचा मुलगा वरुण नंबियार फरार असून पोलिस त्याचा शोध घेत आहेत. पोलिसांचे तपास पथक सुसाईड नोट, भूखंडाची कागदपत्रे, बांधकाम परवाने आणि संबंधित अधिकाऱ्यांची भूमिका बारकाईने तपासत आहेत.