Viral Video : बंगळुरूमध्ये एका रॅपिडो बाईकस्वाराने एका महिलेला कानाशिलात लगावली. हा बाईकस्वार बेदकारपणे बाईक चालवत होता, त्याने ट्रॅफिक सिग्नल देखील तोडला होता. यावरुन महिलेवर बाईकस्वाराने हल्ला केला. ही घटना कॅमेऱ्यामध्ये कैद झाली आहे. घटनेचा व्हिडीओ व्हायरल झाल्यानंतर सोशल मीडियावर संतापाची लाट उसळली आहे.

मिळालेल्या माहितीनुसार, हा संपूर्ण प्रकार बंगळुरूच्या जयनगर या परिसरात घडला आहे. पीडित महिलेने प्रवासादरम्यान बाईकचालकाच्या धोकादायक वर्तनावर प्रश्न उपस्थित केले होते. यावरुन त्या दोघांमध्ये जोरदार वाद सुरु झाला. रस्त्यावर भांडत असताना रॅपिडो बाईकस्वाराने जोरात महिलेच्या कानशिलात लगावली.

शुल्लक कारणावरुन झालेल्या मारहाणीचा व्हिडीओ सध्या सोशल मीडियावर व्हायरल होत आहे. या व्हिडीओमध्ये पीडित महिला आणि रॅपिडो बाईकस्वार रस्त्याच्या कडेला उभे असल्याचे दिसते. काही सेकंदांनंतर बाईकस्वार महिलेच्या जोरात कानशिलात लगावतो. फटका इतका जोरात बसतो की महिला रस्त्यावर खाली पडते. घटनेदरम्यान आसपास लोकांची गर्दी झाल्याचेही व्हिडीओत दिसते.

पीडित महिला सुरुवातीला पोलिसांशी संपर्क करण्यास टाळाटाळ करत होती. या घटनेचा व्हिडीओ व्हायरल झाल्यानंतर पोलिसांनी पीडितेला तक्रार दाखल करण्यास राजी केले. या प्रकरणात अदखलपात्र तक्रार दाखल करण्यात आली आहे. घटनेचा व्हिडीओ सोशल मीडियावर व्हायरल झाल्याचे समोर आल्यानंतर एफआयआर श्रेणीसुधारित करण्याचा विचार करत असल्याचे पोलिसांनी म्हटले आहे.