बागेश्वर धामचे पीठासीन पंडित धिरेंद्र कृष्ण शास्त्री यांच्या प्रवचनाच्या कार्यक्रमात चेंगराचेंगरीची घटना घडली. या चेंगराचेंगरीत ६ जण जखमी झाल्याची प्राथमिक माहिती आहे. राजस्थानच्या भीलवाडा येथे प्रवचनाचा कार्यक्रम आयोजित करण्यात आला होता. या घटनेमुळे एकच खळबळ उडाली आहे.

दरम्यान चेंगराचेंगरीमध्ये जखमी झालेल्यांमध्ये महिला आणि लहान मुलांचा समावेश असल्याची माहिती आहे. कार्यक्रमासाठी VIP पास घेऊन जाणाऱ्या भाविकांना अडवण्यात आलं. भाविकांकडे व्हीआयपी पास असल्यानंतरही त्यांना आत जाऊ दिलं जात नव्हतं. त्यामुळे गेटवर गर्दी वाढली आणि चेंगराचेंगरी सारखी परिस्थिती निर्माण झाली.

या प्रकरणी बनवारी शरण महाराजांनी आयोजकांवर मनमानीचा गंभीर आरोप केलाय. व्हीआयपी पासच्या नावाने कमिटीने मनमानी केल्याचा आरोप त्यांनी केला. काठिया बाबा आश्रम परिसरात बागेश्वर बाबांच्या कथेचा कार्यक्रम होत होता. कमिटीने आश्रमच्या बाबांचं ऐकलंच नाही, असा आरोप आता केला जातोय. काठिया बाबा महंत बनवारीशरण महाराजांनी कमिटी आणि पोलिसांवरही या प्रकरणी आरोप केलेत.

या घटनेत जखमी झालेल्या महिला चंद्रकला सोमानी यांनी माध्यमांना प्रतिक्रिया दिली. “माझ्याकडे व्हीआयपी पास होता. मी बागेश्वर बाबांच्या कथा ऐकण्यासाठी व्हीआयपी गेटवर पोहोचले. पण मला आतमध्ये जाऊ दिलं नाही. त्याचवेळी अनेकजण व्हीआयपी गेटवर जमले होते. त्यांनाही आतमध्ये प्रवेश दिला नाही. त्यामुळेच तिथे चेंगराचेंगरी सारखी परिस्थिती निर्माण झाल्याचं त्या म्हणाल्या.