ammonia gas leak accident : कोल्ड स्टोरेजची भिंत कोसळल्यामुळे ९ जणांचा मृत्यू झाला आहे. उत्तर प्रदेशमधील प्रयागराजमध्ये आज ही दुर्दैवी घटना घडली. अचानक भिंत कोसळल्यामुळे कोल्ड स्टोरेजमध्ये काम करणाऱ्या ९ मजुरांचा ढिगाऱ्याखाली दबून मृत्यू झाला. फाफामऊ परिसरात या दुर्घटनेमुळे एकच गदारोळ उडाला आहे. चांदपूरच्या माजी आमदाराचे हे कोल्ड स्टोरेज असल्याचे सांगितले जात आहे. प्रत्यक्षदर्शीने भिंत कोसळण्याआधी मोठा स्फोटासारखा आवाज ऐकल्याचे सांगितले. अचानक काहीतरी आवाज आला अन् भिंत कोसळली, असे तेथील एका स्थानिकाने सांगितले.

प्रयागराजमधील फाफामऊ परिसरात कोल्ड स्टोरेजची भिंत कोसळल्याची माहिती मिळताच बचाव पथकाने घटनास्थळावर धाव घेतली. तात्काळ ढिगारा काढण्याचे काम सुरू केले आहे. आतापर्यंत ९ मजुरांचे मृतदेह बाहेर काढण्यात आले आहेत. पोलिसांकडून या घटनेची नोंद करण्यात आलेली आहे. ९ मजुरांचे मृतदेह सध्या पोस्टमार्टमसाठी पाठवण्यात आले आहेत. कोल्ड स्टोरेजमधील दुर्घटनेनंतर उत्तर प्रदेशचे मुख्यमंत्री योगी आदित्यनाथ यांनी शोक व्यक्त केला आहे.

दुर्घटना नेमकी कशी घडली? महत्त्वाचे कारण आले समोर

स्थानिक मीडियाने दिलेल्या माहितीनुसार, अमोनिया गॅसचा पाईप फुटल्यामुळे ही दुर्घटना घडलेली असू शकते. अमोनिया गॅसचा पाईप फुटल्यानंतर कोल्ड स्टोरेजमध्ये वायू गळती सुरू झाली. कामगारांमध्ये भीतीचे वातावरण निर्माण झाले अन् ते सैरावैरा धावू लागले. ही दुर्घटना झाली त्यावेळी कोल्ड स्टोरेजमध्ये २० मजूर काम करत होते. अचानक भिंत कोसळल्यामुळे अनेक मजूर ढिगाऱ्याखाली दबले गेले. दरम्यान, जेवणाची वेळ होती. जेवणानंतर सर्वजण आराम करत असतानाच इमारत कोसळली. "आत असलेले कोणीही बाहेर पडू शकले नाही. आम्ही कसाबसा आमचा जीव वाचवला," असे एका कामगाराने सांगितले.

संतप्त जमावाची दगडफेक, नेमकं झालं काय?

दुर्घटनेची माहिती मिळताच बचाव पथक आणि रुग्णवाहिका तात्काळ दाखल झाली. पण त्यांना येण्यास उशीर झाल्याने गावकरी संतप्त झाले आहेत. गावकऱ्यांनी रुग्णवाहिकेवर दगडफेक केली. पोलिसांसोबतही जोरदार वाद झाला. दरम्यान, अडथळ्यानंतर मदतकार्य सुरू करण्यात आले. आतापर्यंत नऊ मृतदेह बाहेर काढण्यात आले आहेत. जेसीबीच्या साहाय्याने बचावकार्य सुरू आहे. प्रयागराजचे पोलीस आयुक्त जोगिंदर कुमार आणि जिल्हाधिकारी मनीष वर्मा घटनास्थळी दाखल झाले आहेत. सध्या ढिगाऱ्याखाली अडकलेल्या लोकांना वाचवण्याचे प्रयत्न सुरू आहेत. एसडीआरएफ आणि एनडीआरएफची पथके घटनास्थळी उपस्थित आहेत. अमोनिया वायूच्या दुर्गंधीमुळे बचावकार्यात अडथळाही येत आहे.