महिन्याच्या सुरूवातीलाच अहमदाबादमधील एअर इंडिया विमानाच्या अपघातामुळे संपूर्ण देश हादरला. या अपघाताचे मुख्य कारण अद्याप समोर आलेले नाही. दरम्यान, या घटनेचा संपूर्ण तपास सुरू आहे. केंद्र सरकारकडून या तपासासाठी एक विशेष पथक नेमण्यात आले. या पथकाकडून विमानाच्या तोडफोडीचा संशयही तपासला जात आहे. केंद्रीय नागरी विमान वाहतूक राज्यमंत्री मुरलीधर मोहोळ यांनी यासंबंधीत माहिती दिली. एएआयबी (एअर इंडिया विमान अपघात) बाबत तोडफोडीच्या शक्यतेचीही तपासणी सुरू असल्याचे ते म्हणाले.

एका वृत्तसंस्थेशी बातचीत करताना मुरलीधर मोहोळ म्हणाले, 'अहमदाबाद विमान अपघाताच्या घटनेचा सर्व बाजूने तपास सुरू आहे. यामध्ये विमानाच्या नुकसानाच्या बाजूनेही तपास केला जातोय. पथकाकडून सीसीटीव्ही फुटेज तपासले जात आहे. मिळालेल्या माहितीनुसार, विमानाचे दोन्ही इंजिन एकाचवेळी बंद पडले. एकाचवेळी इंजिन बंद पडणं फार दुर्मिळ घटना आहे. अशा घटना फार घडत नाही', असं मोहोळ म्हणाले.

ब्लॅक बॉक्सबाबत मुरलीधार मोहोळ म्हणाले, 'अपघातग्रस्त विमानाचा ब्लॅक बॉक्स सापडला आहे. यात कॉकपीट व्हॉईस रेकॉर्डर आणि फ्लाईट डेटा रेकॉर्डरचा समावेश आहे. या बॉक्समध्ये विमानाची सर्व माहिती असते. यामुळे विमान अपघाताची कारणं समजून घेण्यास मदत होते', असं मोहोळांनी स्पष्ट केलं.

तसेच 'अपघाताचं मुख्य कारण तपास अहवाल समोर आल्यानंतर समजेल. इंजिनीत बिघाड की इंधन पुरवठा होत असताना समस्या निर्माण झाली, की या अपघातामागे आणखी कोणतं कारण आहे? हे तपासातून समोर येईल. या विमान अपघाताचा तपास अहवाल येत्या तीन महिन्यांत समोर येईल', असं मोहोळ यांनी स्पष्ट केलं.