अहमदाबादमध्ये घडलेल्या भीषण एअर इंडिया विमान अपघातात आतापर्यंत ३६५ लोकांनी प्राण गमावले आहेत. या दुर्घटनेत रवी ठाकोर यांच्या कुटुंबातील दोन सदस्यांचा दु्र्देवी मृत्यू झाला. त्यांची आई आणि दोन वर्षाच्या चिमुकलनं आपले प्राण सोडले. मात्र, या घटनेदरम्यान रवी ठाकोर यांच्यामुळे नकळतपणे जवळपास ८० डॉक्टरांचे प्राण वाचले. पण ठाकोर कुटुंबावर सध्या दुखा:चा डोंगर कोसळला आहे.

रवी ठाकोर हे गेल्या १५ वर्षांपासून बीजे मेडिकल कॉलेज, सिव्हिल हॉस्पिटलमधील डॉक्टरांना नियमित जेवण पुरवत आहेत. अपघाताच्या दिवशी, १ वाजता ते नेहमीप्रमाणे टिफिन देण्यासाठी पत्नी, वडील व एका नातेवाईकाशी बाहेर पडले. त्यांची दोन वर्षांची मुलगीदेखील सोबत येण्याचा हट्ट करत होती. ती झोपल्यानंतर रवी यांनी तिला तिच्या आई सरला ठाकोर यांच्याकडे मेसमध्ये ठेवले आणि टिफिन घेऊन हॉस्पिटलकडे रवाना झाले.

जेव्हा रवी डॉक्टरांना जेवण देण्यासाठी हॉस्पिटलमध्ये गेले, तेव्हा त्यांनी डॉक्टरांना कॅन्टीनऐवजी आतच जेवायला सांगितले. त्याच क्षणी, जवळपास १:४० वाजता विमान अपघात झाला. जे डॉक्टर कॅन्टीनमध्ये जायचे होते, ते आतच थांबले आणि यामुळे त्यांचे प्राण वाचले. जवळपास ८० डॉक्टरांचे प्राण वाचले असल्याची माहिती आहे.

"होत्याचं नव्हतं झालं"

रवी ठाकोर सांगतात, 'माझी मुलगी रडत होती, पण टिफिन घ्यावं म्हणून तिला आईसोबत ठेवून निघालो. स्फोट झाला, सगळीकडे गोंधळ उडाला. धूरच धूर होता. आई आणि मुलगी मेसमध्येच होत्या. पोलिसांनी आम्हाला पुढे जाऊ दिलं नाही', अशी माहिती त्यांनी दिली.

'दोन दिवस आम्ही आई आणि मुलीचा शोध घेत होतो. पण आई आणि मुलगी काही सापडली नाही. शेवटी डीएनए अहवाल समोर आला. आई आणि मुलीच्या मृतदेहाचा ताबा देण्यासाठी आम्हाला बोलावण्यात आलं. गुरूवारी दोघांचे अंतिम संस्कार पार पडले'. या घटनेनंतर ठाकोर कुटुंबावर दुखा:चा डोंगर कोसळला आहे.