Aam Aadmi Party : आम आदमी पक्षाचे नेते कुंज बिहारी निषाद यांचे एका खासगी रुग्णालयात निधन झाले आहे. ते उत्तरप्रदेशातील गोरखपूर येथे २३ ऑगस्ट रोजी झालेल्या हाणामारीत जखमी झाले होते. निधनानंतर त्यांच्या कुटुंबीयांनी रुग्णालयावर उपचारात निष्काळजीपणाचा आरोप करत संताप व्यक्त केला. यानंतर रुग्णालयामध्ये गोंधळाला सुरुवात झाली.

मिळालेल्या माहितीनुसार, आम आदमी पक्षाचे नेते कुंज बिहारी निषाद हे बांधकाम साहित्याशीसंबंधित व्यवसायिक होते. मागील महापालिका निवडणुकीत त्यांनी नगरसेवकाची निवडणूक लढवली होते. त्या वेळस जिथे कुंज बिहारी यांनी वाळू टाकली होती, तेथेच अभिषेक पांडे या व्यक्तीचे घर त्याच परिसरात बांधले जात होते. २३ ऑगस्ट रोजी कुंज बिहारी हे त्यांच्या मेहुण्यासह अभिषेकच्या घरी थकबाकीचे ५० हजार रुपये मागण्यासाठी गेले.

अभिषेकने थकबाकीचे पैसे मागण्यासाठी आलेल्या कुंज बिहारी निषाद आणि त्यांच्या मेहुण्यावर हल्ला केला. अभिषेकने त्याच्या १० ते १२ साथीदारांसह दोघांवर हल्ला केल्याचे म्हटले जात आहे. या हल्ल्यात दोघेही गंभीररित्या जखमी होते. त्यांना रुग्णालयात दाखल करण्यात आले. या प्रकरणी अभिषेक पांडेसह १२ जणांवर गुन्हा दाखल करण्यात आला. आज (२६ ऑगस्ट) कुंज बिहारी यांचा मृत्यू झाला.

कुंज बिहारी यांचा मृत्यू झाल्यानंतर कुटुंबातील सदस्य आणि आम आदमी पक्षाच्या कार्यकर्त्यांनी प्रचंड गोंधळ घातला. याची माहिती मिळताच पोलीस घटनास्थळी पोहोचले. काही वेळाने तेथे कुटुंबातील सदस्य, आप पक्षाचे कायकर्ते आणि पोलीस असा संघर्ष सुरु झाला. त्यानंतर दगडफेक सुरु झाली. यादरम्यान परिस्थिती नियंत्रणात आणण्याचा प्रयत्न करणाऱ्या एका पोलीस अधिकाऱ्याला दगड लागला आणि त्याचे डोके फुटले. त्यांना जखमी अवस्थेत ताबडतोब रुग्णालयात दाखल करण्यात आले.