Greater Noida News: ग्रेटर नोएडा येथे बहुमजली इमारतीवरून उडी मारून शिकाऊ डॉक्टरने आयुष्य संपवल्याची घटना घडली आहे. ग्रेटर नोएडामधील बिसरख पोलीस स्टेशनच्या हद्दीत ही धक्कादायक घटना घडली आहे. २९ वर्षीय डॉक्टरने २१ मजल्यावरून उडी मारून आत्महत्या केली. तरुण डॉक्टरच्या आत्महत्येने रुग्णालयातील कर्मचारी वर्गात खळबळ उडाली आहे.

डॉक्टर तरुणाने आत्महत्या केल्याची माहिती मिळताच पोलिसांनी घटनास्थळी धाव घेतली. पोलिसांनी तातडीने मृतदेह ताब्यात घेऊन पोस्टमार्टमसाठी पाठवण्यात आला. डॉक्टरच्या आत्महत्येचं कारण अद्याप समोर आलेलं नाही. पोलिसांनी या प्रकरणाचा पुढील तपास सुरु केला आहे.

शिवा पुत्र राकेश कुमार शर्मा असे आत्महत्या केलेल्या शिकाऊ डॉक्टरचे नाव आहे. पोलिसांनी दिलेल्या माहितीनुसार, डॉक्टर शिवा याने २१ व्या मजल्यावरून उडी मारून आयुष्य संपवलं. शिवा ग्रेटर नोएडामधील एका रुग्णालयात इंटर्नशिप करत होता. शिवा हा त्याची आई आणि बहिणीसोबत राहत होता. त्याने आज दुपारी फ्लॅटमधील बालकनीमध्ये जाऊन उडी मारली. त्यानंतर त्याला तातडीने रुग्णालयात दाखल केलं. मात्र, डॉक्टरांनी त्याला मृत घोषित केलं.

पोलिसांनी दिलेल्या माहितीनुसार, डॉक्टर शिवाजवळ कोणत्याही प्रकारची चिठ्ठी मिळालेली नाही. शिकाऊ डॉक्टर शिवाच्या आत्महत्येविषयी कोणतीही माहिती समोर आलेली नाही. पोलिसांनी पंचनामा करून मृतदेह पोस्टमार्टमसाठी पाठवला. यावेळी मृताचे कुटुंबातील सदस्य देखील उपस्थित होते.

कुटुंबातील सदस्यांनी दिलेल्या माहितीनुसार, शिकाऊ डॉक्टर मूळचा मथुरा येथे राहणारा होता. शिकाऊ डॉक्टर हा आई-वडिलांसोबत बहिणीच्या घरी आला होता. त्याने बहिणीच्या घरी प्लॅटमधील बाल्कनीतून उडी मारून आयुष्य संपवलं. शिवा हा २०१५ च्या बॅचचा विद्यार्थी होता. त्याने एका खासगी कॉलेजमधून एमबीबीएसचं शिक्षण पूर्ण केलं होतं. कोरोनाच्या काळात म्हणजे २०२० सालापासून एका गंभीर आजाराचा सामना करत होता. या गंभीर आजाराने शिकाऊ डॉक्टर त्रस्त होता. त्यामुळे ट्रेनिंग देखील घ्यायला जमली नव्हती.