गिरीश कांबळे, साम टीव्ही, प्रतिनिधी

''आज मला एक गोष्टीचं बरं वाटतं आहे. तुमच्या डोळ्यावर झापड होतं, ते आता पुसलं गेलं आहे. मी हिंदुत्वाचे विचार सोडले, शिवसेना विकली, ती दूर नेहली, असे आरोप केले गेले. अनेकजण भुलले. पण आता डोळे उघडले आहेत, सगळ्यांचे. ज्यांच ऐकून आहारी गेलेलात ते सगळे आता परत येतायत,'' असं शिवसेना (उद्धव बाळासाहेब ठाकरे) पक्षप्रमुख उद्धव ठाकरे म्हणाले आहेत.

आज उद्धव ठाकरे यांनी कल्याण डोंबिवलीमध्ये मुख्यमंत्री एकनाथ शिंदेंना मोठा झटका दिला आहे. युवासेना राज्य सचिव आणि माजी स्थायी समिती सभापती दीपेश म्हात्रे शिंदे गटाला जय महाराष्ट्र करत ठाकरे गटात प्रवेश केला आहे. दीपेश यांच्यासह काही माजी नगरसेवकांनीही ठाकरे गटात प्रवेश केला. याचवेळी बोलताना उद्धव ठाकरे असं म्हणाले आहेत.

यावेळी बोलताना उद्धव ठाकरे म्हणाले की, ''महाराष्ट्र विकणे हा विचार बाळासाहेब यांचा कधीच नव्हता. आम्ही स्वाभिमानाने जगू, पण लाचारी स्वीकारणार नाही, हा विचार ठेवला आहे. अनेक शेळ्या शेपट्या हलवत आहेत, सत्तेपोटी आणि सत्तेसाठी. फक्त इतकंच बोलेन थोडं आधी निर्णय घेतला असता, आधी आले असते तर ती गुलुमशाही लोकसभेलाच गडली असती.''

ते म्हणाले, काल्यणमध्ये मला एका गोष्टीचा अभिमान आहे. तिथे गुंडशाही असून सुद्धा 4 लाख मतं एका सध्या शिवसेनेच्या कार्यकर्त्याला मिळाली. मुख्यमंत्री यांचे पुत्र समोर होते. प्रचंड पैसे ओतले, हेराफेरी केली, सध्या कार्यकर्त्याला पाडण्यासाठी पंतप्रधान आले. पण तरीही तिथल्या शिवसैनिकांनी 4 लाख मतं दिली.

ठाकरे पुढे म्हणाले, ''त्यांनी (एकनाथ शिंदे यांनी) सत्तेच्या लोभापायी सरकार पाडलं. पण शिवसेना संपवायला गेले, त्यांना घेणार नाही. त्यांना निवडणूकीत उभं पण राहू देणार नाही. तुमची दिशाभूल झाली म्हणून परत घेतोय, कारण तुम्ही शिवसेना आणि शिवसेनेचे भविष्य आहात. अनेक बाळासाहेबांच्या कार्यकर्त्यांना मोहमाया टाकून फसवलं गेलं. त्यांचं स्वागत मी करतो.''