संजय गडदे

Mumbai News : शॉपिंग मॉलमधील गेम झोनमध्ये जम्पिंग गेम खेळणाऱ्यांसाठी एक महत्त्वाची बातमी आहे. मुंबईतील एका मॉलमधील गेम झोनमध्ये बाऊन्स गेम खेळल्यामुळे एका तरुणाचा पाय मोडला. 18 जून रोजी तीर्थ कांजी बेरा नावाचा विद्यार्थी आपल्या मित्रांसह मालाड, मुंबई येथील इन्फिनिटी मॉलमध्ये गेम झोनमध्ये खेळण्यासाठी गेला होता.

गेम झोनमध्ये जाण्यापूर्वी त्याने तिकीट काढले आणि बाउन्स गेमसाठी उडी मारली. तेव्हा बाऊन्स ट्रॅम्पोलिनचा स्प्रिंग तुटला आणि तो तरुण पडला. त्यानंतर या तरुणाच्या उजव्या पायात तीव्र वेदना होऊ लागल्याने त्याला कुर्ल्यातील क्रिटीकेअर एशिया हॉस्पिटलमध्ये नेण्यात आले. तेथे डॉक्टरांनी उजव्या पायाच्या गुडघ्याच्या खाली असलेल्या हाडात फ्रॅक्चर झाल्याचे सांगितले. (Latest Marathi News)

तीर्थ कांजी बेरा हा १९ वर्षांचा आहे आणि तो विद्यार्थी राहतो. सध्या तीर्थवर रुग्णालयात उपचार सुरु आहेत. ज्यावेळी तीर्थसोबत हा अपघात झाला, त्यावेळचा एक व्हिडीओही समोर आला आहे. ज्यामध्ये तुम्ही पाहू शकता की, तीर्थ उडी मारतो आणि जम्पिंग गेमची स्प्रिंग तुटते.

दुसरीकडे, हे प्रकरण उघडकीस आल्यानंतर बांगूर नगर पोलिसांनी गेम झोनच्या व्यवस्थापकाविरुद्ध एफआयआर दाखल केला आहे. याप्रकरणी गुन्हा दाखल करण्यात आला असून एका आरोपीला अटक करण्यात आली आहे.

बांगूर नगर पोलिसांनी (Police) सांगितले की, याप्रकरणी भादंवि कलम ३३६, ३३८ अन्वये निष्काळजीपणाचा गुन्हा दाखल करण्यात आला आहे. सध्या पोलिसांनी एका आरोपीला अटक केली असून संपूर्ण प्रकरणाचा तपास सुरू आहे.