- अभिजीत देशमुख

Kalyan News : बेतुरकर पाडा परिसरात सुरळीत पाणी पूरवठा व्हावा या मागणीसाठी आज (साेमवार) महिलांनी कल्याण महापालिकेच्या प्रवेशद्वारावर हंडा कळशी माेर्चा काढला आहे. यावेळी महिलांनी महापालिकानजीक उपोषण देखील सुरू केले आहे. (Maharashtra News)

कल्याण मधील बेतुरकर पाडा परिसरात गेल्या अनेक वर्षांपासून पाणी समस्या तीव्र बनली आहे. सातत्याने कमी दाबाने होणारा पाणीपुरवठा, दूषित पाणीपुरवठा यामुळे नागरिक त्रस्त आहेत.

गेल्या 40 वर्षांपासून या ठिकाणच्या पाईपलाईन बदलण्यात आलेल्या नाहीत. त्यामुळे ही समस्या भेडसावत असल्याचा आरोप नागरिकांनी केला आहे. आम्ही पाण्याच्या समस्येबाबत अनेकदा आंदोलने केली, प्रशासनास निवेदने दिले परंतु महापालिकेने कायमच आमच्या मागण्यांकडे दुर्लक्ष केल्याचे महिलांनी सांगितले.

दरम्यान आज सामाजिक कार्यकर्ते राणी कपोते यांच्या नेतृत्वाखाली स्थानिक महिलांनी महापालिका मुख्यालयावर माेर्चा काढला. यावेळी महिलांनी महापालिकेच्या विरोधात जोरदार घोषणाबाजी करत हंडा कळश्यांसमवेत महापालिकेच्या प्रवेशद्वाराच्या बाजूलाच उपोषण सुरू केले.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

जोपर्यंत पाणी समस्येबाबत ठोस कार्यवाही होत नाही तोपर्यंत उपोषण सुरूच राहणार असल्याचे महिला आंदाेलकांनी स्पष्ट केले.

Edited By : Siddharth Latkar