ठाणे जिल्ह्यातील भिवंडीत वेश्याव्यवसाय करणाऱ्या टोळीचा पर्दाफाश झाला आहे. ठाणे पोलिसांच्या मानव तस्करी विरोधी कक्षानं (Anti-Human Trafficking Cell) कारवाई करत हॉटेलमध्ये सुरू असलेलं रॅकेट उद्ध्वस्त केले आहे.

यात सेक्स रॅकेट चालवणाऱ्या एजंट महिलेला अटक केली आहे.या कारवाईत महिलांना देहव्यापारासाठी प्रवृत्त करून आर्थिक शोषण करणाऱ्या महिला एजंटला अटक करण्यात आली असून दोन महिलांची सुटका करण्यात आली आहे. अटक करण्यात आलेल्या आरोपीचे नाव मुश्रत अन्सार मिर्झा (वय ४०) असून ती मुंबईच्या सांताक्रूझ (पूर्व) येथील रहिवासी आहे.

गुप्त माहितीच्या आधारे छापा

२० जानेवारी रोजी मानव तस्करीविरोधी कक्षाला भिवंडी तालुक्यातील गोवे नाका परिसरातील हॉटेल संदीप वेजेस येथे वेश्याव्यवसाय सुरू असल्याची गोपनीय माहिती मिळाली होती. या माहितीच्या आधारे पोलिसांनी सापळा रचत दुपारी साडेतीनच्या सुमारास छापा टाकला.

दोन महिलांची सुटका

छाप्यात मुश्रत मिर्झा हिला ताब्यात घेण्यात आले असून तिच्या तावडीतून ३६ आणि ३३ वर्षांच्या दोन महिलांची सुटका करण्यात आली. या प्रकरणी कोंगाव पोलीस ठाण्यात आरोपीविरोधात भारतीय न्याय संहिता २०२३ च्या कलम १४३(१), १४३(३) तसेच अनैतिक मानवी वाहतूक प्रतिबंधक कायदा (PITA) १९५६ मधील कलम ४ आणि ५ अंतर्गत गुन्हा दाखल करण्यात आला आहे.

पोलीस अधिकाऱ्यांनी दिलेल्या माहितीनुसार, मुख्य आरोपीला अटक करण्यात आली असून या रॅकेटमध्ये सहभागी असलेल्या इतर आरोपींचा शोध सुरू आहे. पुढील तपास ठाणे पोलिसांकडून करण्यात येत आहे.