सचिन जाधव

Pune Crime: पुण्यात डॉक्टर महिलेला सायबर चोरट्यांनी २३ लाख ८३ हजार रुपयांचा गंडा घातल्याचा प्रकार उघडकीस आला आहे. या प्रकरणी शिवाजीनगर पोलीस स्टेशनमध्ये चोरट्यांविरुद्ध गुन्हा दाखल करण्यात आला आहे. (Latest Marathi News)

याबाबत एका ५० वर्षीय डॉक्टर (Doctor) महिलेने शिवाजीनगर पोलीस (Police) ठाण्यात फिर्याद दिली आहे. सायबर चोरट्यांच्या विरुद्ध माहिती-तंत्रज्ञान कायद्यान्वये गुन्हा दाखल करण्यात आला आहे. तक्रारदार डॉक्टर महिला शिवाजीनगर भागात वास्तव्यास आहे. आरोपींनी डॉक्टर महिलेला समाजमाध्यमातून संदेश पाठविला होता.

समाजमाध्यमातील जाहिरातीच्या ध्वनिचित्रफितींना दर्शक पसंती मिळवून (लाइक्स) दिल्यास चांगला परतावा मिळेल,असे आमिष चोरट्यांनी संदेशाव्दारे दाखविले होते. चोरट्यांनी महिलेला ‘टास्क’ पूर्ण करण्यास सांगितले होते. (Pune News)

सुरुवातीला डॉक्टर महिलेला काही रक्कम भरण्यास सांगण्यात आले. सायबर चोरट्यांनी आणखी पैसे देण्याचे आमिष त्यांना दाखविले. त्यानंतर त्यांना वेळोवेळी आमिष दाखवून त्यांच्याकडून २३ लाख ८३ हजार रुपये उकळले. फसवणूक झाल्याचे लक्षात आल्यानंतर त्यांनी पोलिसांकडे तक्रार दिली. याचा तपास पोलिस करत आहेत.