संघर्ष गांगुर्डे, कल्याण | साम टीव्ही

भावोजींसोबत म्हणजेच बहिणीच्या नवऱ्यासोबत संबंध असल्याच्या संशयावरून एका महिलेला घरात कोंडून मारहाण केल्याची घटना घडली आहे. कल्याणमध्ये हा प्रकार घडला आहे. महिलेच्या तक्रारीवरून खडकपाडा पोलिसांनी या प्रकरणी गुन्हा नोंदवला आहे.

कल्याणमधील खडकपाडा पोलीस ठाण्याच्या हद्दीत ही घटना घडली. बहिणीचा नवरा म्हणजेच भावोजींसोबत संबंध आहेत असा संशय एका महिलेवर घेण्यात आला. त्यावरून तिला घरात डांबले आणि मारहाण करण्यात आली. पीडित महिलेने खडकपाडा पोलिसांत दिलेल्या तक्रारीनुसार, काही दिवसांपूर्वी तिला एका महिलेचा फोन आला होता. लोनवाले साहेब आले आहेत, तुम्ही लगेच या असे तिला सांगण्यात आले. त्यावर ती संबंधित ठिकाणी पोहोचली.

महिलेला सांगितल्याप्रमाणे ती संबंधित घरी पोहोचली. त्याठिकाणी आधीच दोघे जण होते. त्यांनी तिला त्या घरातच डांबले. तिला बेदम मारहाण केली. तुझे आमच्या भावोजींसोबत संबंध आहेत, तुझी एवढी हिंमत कशी? असे म्हणत तिचा अपमान करण्यात आला. तसेच तिच्यासोबत गैरवर्तन केल्याचाही आरोप तक्रारीत करण्यात आला आहे.

तक्रारदार महिलेच्या म्हणण्यानुसार, जवळपास दोन तास हा प्रकार सुरू होता. त्या व्यक्तीशी कोणताही संबंध नसतानाही आपल्यावर खोटे आरोप करून मारहाण करण्यात आल्याचा दावा महिलेने केला आहे. आरोपींवर कठोर कारवाई करण्याची मागणीही तिने केली. या प्रकरणी खडकपाडा पोलिसांनी गुन्हा दाखल केला आहे. पुढील तपास सुरू आहे. याबाबत कल्याण विभागाचे एसीपी अशोक होनमाने यांनी सांगितले की, या प्रकरणात गुन्हा नोंदवण्यात आला असून तपासाच्या आधारे संबंधितांवर योग्य ती कायदेशीर कारवाई केली जाईल.