मुंबईकरांसाठी आनंदाची बातमी. वेस्टर्न एक्सप्रेस हायवे (WEH) आणि वांद्रे कुर्ला कॉम्प्लेक्स (BKC) दरम्यान प्रवास करणाऱ्या वाहनचालकांचा प्रवास सुसाट होणार आहे. कारण सांताक्रूझ ते चेंबूर - लिंक रोड (SCLR) या कनेक्टर आर्मचे काम पूर्णत्वास आले आहे. या कनेक्टरमुळे मुंबईतील वाहतूक कोंडी कमी होणार असून प्रवाशांचा वेळ वाचणार आहे.

हा बहुप्रतिक्षित कनेक्टर WEH ते मुंबई विद्यापीठ आणि BKC ला थेट जोडणार आहे. ज्यामुळे परिसरातील वाहतूक कोंडी लक्षणीयरीत्या कमी होईल. हा कनेक्टर एकदा कार्यान्वित झाल्यानंतर, WEH आणि BKC मधील दोन्ही दिशांना प्रवास वेळ जवळजवळ ३० ते ३५ मिनिटांनी कमी होईल अशी शक्यता वर्तवण्यात आली आहे. हा प्रकल्प मार्च २०२६ पर्यंत पूर्ण होण्याची शक्यता आहे.

मुंबई महानगर प्रदेश विकास प्राधिकरणाच्या (एमएमआरडीए) अधिकाऱ्यांनी सांगितले की, कनेक्टरच्या दोन्ही महत्त्वाच्या भागांचे बांधकाम सध्या शेवटच्या टप्प्यात आहे. एमएमआरडीएच्या एका अधिकाऱ्याने सांगितले की, "लेव्हल १ वर WEH ला BKC ला जोडण्यासाठी विद्यमान वाकोला पुलाचा वापर करणाऱ्या कनेक्टर आर्म २ वर सध्या डेक स्लॅबचे काम सुरू आहे. दरम्यान, लेव्हल २ वर BKC ला SCLR १ ला जोडणाऱ्या कनेक्टर आर्म ३ मध्ये फक्त ५४ मीटरचा एकच स्पॅन उभारायचा आहे. यासोबतच, वॉटरप्रूफिंग, वेअरिंग कोट्स, अँटी-क्रॅश बॅरियर्स बसवणे आणि रंगकाम करणे यासारखी फिनिशिंगची कामे संपूर्ण स्ट्रक्चरवर शेवटच्या टप्प्यात आहेत."

अधिकाऱ्यांच्या मते, जवळजवळ ८५ टक्के काम आधीच पूर्ण झाले आहे. कनेक्टर आर्म ३ चा अंतिम स्पॅन उभारल्यानंतर आणि फिनिशिंग काम पूर्ण झाल्यानंतर, कनेक्टर वाहतुकीसाठी तयार होईल . संपूर्ण प्रकल्प ३१ मार्च २०२६ पर्यंत सुरु होण्याची अपेक्षा आहे. एकूण २०७ कोटी रुपये खर्चून बांधलेला हा कनेक्टर १.४ किमी लांबीचा असून सुमारे ५०० मीटरमध्ये १७.२ मीटर रुंदीचा चार-लेन कॅरेजवे असेल, तर ९०० मीटरमध्ये ८.५ मीटर रुंदीचा दोन-लेनचा मार्ग असेल.