मावळ तालुका हा सर्वात जास्त पर्जन्यमान असणारा तालुका समजला जातो. मात्र तीव्र उन्हाच्या झळांनी मावळ तालुक्यात देखील पाण्याची टंचाई आता भासू लागली आहे. मावळ तालुक्यात मोठी आणि छोटी अशी मिळून 11 धरणे असूनही नाणे गावातील महिलांना पाण्यासाठी वणवण करावी लागत आहे.

नाणे गावातील ग्रामस्थ पाण्याच्या समस्येने हैराण झाले आहेत. गेल्या अनेक दिवसांपासून गावामध्ये जलजीवन मिशन अंतर्गत पाणीपुरवठा केला जातो. परंतु पाणी पुरवठा दूषित होत असल्याने गावातील नागरिकांना विविध आजारांना सामोरे जावे लागत आहे. यालाच पर्याय म्हणून गावातील पुरातन विहिरीतून पाणी घेण्यास गावकऱ्यांनी सुरुवात केली.

दरम्यान विहिरीचे देखील पाणी अस्वच्छ आहे. विहिरीतील गाळ न काढल्यामुळे आता गावकऱ्यांना अस्वच्छ पाणीच प्यावे लागत आहे. वारंवार ग्रामपंचायतीला मागणी करून देखील स्वच्छ पाण्याचा पुरवठा होत नसल्याचा आरोप ग्रामस्थ करत आहेत. इंद्रायणी नदी या गावाच्या उशाला असताना देखील नाणे गावातील ग्रामस्थांच्या घशाला कोरड असल्याचे चित्र निर्माण झाले आहे.

Edited By : Siddharth Latkar