सचिन जाधव, पुणे प्रतिनिधी

Current water storage in Khadakwasla, Panshet, and Temghar dams : पुण्याला पाणीपुरवठा करणाऱ्या धरणांच्या पाणलोट क्षेत्रात यंदा पावसाने जोरदार हजेरी लावली, त्यामुळे धरणाच्या पाणीसाठ्यात लक्षणीय वाढ झाली आहे. खडकवासला, पानशेत, वरसगाव आणि टेमघर धरणांमध्ये एकूण २०.२७ टीएमसी (६९.५२ %) पाणीसाठा जमा झाला आहे. गेल्या वर्षीच्या तुलनेत यंदा १ टीएमसी जास्त पाणी उपलब्ध आहे. पवना धरण ९४% भरले असून, उजनी धरणही १००% भरण्याच्या मार्गावर आहे. या वाढीमुळे पुणे शहर आणि परिसरातील पाणीटंचाईचे संकट टळले आहे. जलसंपदा विभागाने नदीकाठच्या नागरिकांना सतर्कतेचा इशारा दिला आहे.

खडकवासला धरण साखळीत पाणीसाठ्यात वाढ

खडकवासला धरण साखळीतील चारही धरणांमध्ये यंदा पाणीसाठ्यात लक्षणीय वाढ झाली आहे. आजअखेर खडकवासला, पानशेत, वरसगाव आणि टेमघर धरणांमध्ये एकूण ५.४२ टीएमसी पाणीसाठा शिल्लक आहे. गेल्या वर्षी याच दिवशी हा साठा ४.१३ टीएमसी होता. यंदा मागील वर्षाच्या तुलनेत एक टीएमसी जास्त पाणीसाठा उपलब्ध आहे, ही पुणेकरांसाठी आनंदाची आणि दिलासादायक बाब आहे.

कोणत्या धरणात किती पाणीसाठी ?

जलसंपदा विभागाच्या माहितीनुसार, एक जूनपासून खडकवासला धरणाच्या पाणलोट क्षेत्रात ७५ मिलिमीटर पावसाची नोंद झाली आहे. सध्या खडकवासला धरणात ०.८४ टीएमसी पाणी शिल्लक आहे. पानशेत धरणात १९ मिलिमीटर पाऊस पडला असून, एक जूनपासून ४८ मिलिमीटर पावसाची नोंद आहे. या धरणात १.६२ टीएमसी पाणीसाठा आहे. वरसगाव धरणात १७ मिलिमीटर पाऊस पडला असून, एक जूनपासून ४९ मिलिमीटर पावसाची नोंद आहे. येथे २.७९ टीएमसी पाणी शिल्लक आहे. मात्र, टेमघर धरणात यंदा पावसाचा अभाव आहे. एक जूनपासून केवळ ४१ मिलिमीटर पाऊस पडला असून, या धरणात फक्त ०.१७ टीएमसी पाणी शिल्लक आहे.

पुणेकरांचे पाण्याचे टेन्शन संपणार ?

धरणातील या पाणीसाठ्याच्या वाढीमुळे पुणे शहर आणि परिसरातील पाणीटंचाईचे संकट कमी होण्याची शक्यता आहे. जलसंपदा विभागाने पाण्याचा काटकसरीने वापर करण्याचे आवाहन केले आहे, तसेच नदीकाठच्या नागरिकांना सतर्क राहण्याचा इशारा दिला आहे. पुढील काही दिवसांत पुण्यामध्ये मुसळधार पावसाची शक्यता वर्तवण्यात आली आहे. त्यामुळे यंदा पाणीकपातीचे टेन्शन संपण्याची शक्यता आहे. काही दिवसातच वर्षभर पुरेल इतका पाणीसाठा उपलब्ध होऊ शकतो.