Maval Bandh News : पवन मावळातील (Maval) कोथर्णे गावातील एका अल्पवयीन मुलीचा मृतदेह बुधवारी एका शाळेच्या पाठीमागे मिळाला हाेता. या प्रकरणात पोलिसांनी एकास ताब्यात घेऊन त्याची चाैकशी केल्यानंतर त्यास अटक केली. दरम्यान संशयित आराेपीस फाशीची शिक्षा द्यावी या मागणीसाठी आज (गुरुवार) पवनानगर भागात कडकड़ीत बंद पाळण्यात आला.

या प्रकरणी कामशेत पोलिसांनी तेजस उर्फ दादा महिपती दळवी याला अटक केली असून त्याच्यावर पोस्को अंतर्गत तसेच खूनाचा देखील गुन्हा दाखल करण्यात आला आहे. आज मावळ येथील कामशेत, वड़गाव याठिकाणी नागरिक एकत्रित आले. त्यांनी निषेधाच्या घाेषणा देत संशयितास कठाेर शिक्षा झाली पाहिजे अशी मागणी केली. पवनानगर बाजारपेठ आज पुर्णत: बंद ठेवण्यात आली हाेती.

दरम्यान या बंदमधून शाळा आणि शैक्षणिक संस्थांना वगळण्यात आले हाेते. सर्व शाळा व शिक्षण संस्थांमध्ये पीडित मुलीला श्रद्धांजली अर्पण करावी असे संबंधित सोशल मीडिया पोस्टमध्ये नमूद करण्यात आलं हाेते.

या नराधमाला फाशीची शिक्षा द्या अशी मागणी मावळ तालुक्यातील विविध संघटनांनी केली आहे. तसेच हा खटला फास्ट ट्रॅक काेर्टात चालवावा तसेच संशियत आरोपीच्या आईस सहआरोपी करावे अशी मागणी मुख्यमंत्री एकनाथ शिंदे (Eknath Shinde) यांना करणार असल्याचे आमदार उमा खापरे यांनी सांगितलं.

Edited By : Siddharth Latkar