सिद्धेश म्हात्रे, साम टीव्ही

नवी मुंबईतील उरण परिसरात यशश्री शिंदे या २२ वर्षीय तरुणीची एका नराधमाने अत्यंत निर्घृणपणे हत्या केली. हत्येनंतर आरोपी दाऊद शेख हा फरार झाला आहे. पोलिसांकडून त्याचा शोध घेतला जात आहे. या घटनेनं परिसरातून संताप व्यक्त केला जातोय. दरम्यान, यशश्री शिंदे हिच्या हत्येपूर्वीचा सीसीटीव्ही फुटेज समोर आला आहे. यामध्ये आरोपी दाऊद शेख हा तिचा पाठलाग करत असल्याचं दिसून येतंय.

व्हिडीओत तुम्ही पाहू शकता, की यशश्री शिंदे ही रस्त्याने जाताना दिसून येत आहे. त्याचवेळी आरोपी दाऊद हा तिचा पाठलाग करत आहे. हा व्हिडीओ पाहून अनेकांनी संताप व्यक्त केलाय. आरोपीवर कठोरात कठोर कारवाई करा, अशी मागणी परिसरातील नागरिक करीत आहेत. दरम्यान, यशश्री शिंदेच्या हत्येनंतर तिच्या कुटुंबियांनी मोठा आक्रोश केलाय.

आरोपी दाऊद याच्यावर लवकरात लवकर कारवाई करा, तसेच हा खटला फास्टट्रॅक कोर्टात चालवून त्याला फाशी द्या, अशी मागणी तिच्या कुटुंबीयांनी केली आहे. आरोपीसोबत आमच्या मुलीचे प्रेमसंबंध होते, अशी खोटी माहिती पसरवली जात असून आहे. त्यामुळे आमची बदनामी थांबवा अशी विनंती यशश्रीच्या आई-वडीलांनी केली आहे.

दाऊदने यशश्रीची हत्या का केली?

मिळालेल्या माहितीनुसार, आरोपी दाऊद हा अनेक दिवसांपासून यशश्रीच्या पाठीमागे लागला होता. त्याने २०१९ मध्ये यशश्रीला त्रास देखील दिला होता. तेव्हा पोलिसांनी त्याच्यावर पोक्सो कायद्याअंतर्गत गुन्हा दाखल केला. याप्रकरणी आरोपी दाऊदला जेलमध्ये देखील जावे लागले होते. याच गोष्टीचा राग आरोपी दाऊदच्या मनात होता.

तेव्हापासून ते यशश्रीला त्रास देत होता. पण तिने याबाबत कुणालाही सांगितले नाही. दरम्यान, यशश्री अचानक बेपत्ता झाली होती. दोन दिवसानंतर तिचा मृतदेह उरण-पनवेल रेल्वे मार्गालगतच्या झुडपात सापडला होता. तिचे अवयव कापून ही हत्या करण्यात आली होती. त्यामुळे स्थानिक नागरिकांमध्ये प्रचंड संताप निर्माण झाला. यशश्रीवर अंत्यसंस्कारही करण्यात आले.