सागर आव्हाड, साम टीव्ही प्रतिनिधी
पुणे : गेल्या काही दिवसांपासून कडक उन्हामुळे नागरिकांच्या अंगाची लाहीलाही झाली होती. मागील दोन दिवसांत पुण्याचे तापमान ४१ सेल्सिअसपर्यंत पोहोचलं होतं. या तापमानामुळे शहरात उष्माघाताचे रुग्ण वाढले होते. या कडक उन्हाने त्रस्त झालेल्या नागरिकांना आज गुरुवारी निसर्गाने मोठा दिलासा आहे. ऐन उन्हाळ्यात कोसळलेल्या अवकाळी पावसाने उकाड्याने त्रस्त झालेल्या पुणेकरांना मोठा दिलासा दिला आहे.
पुणे शहरात आज गुरुवारी विविध भागात जोरदार पावसाने हजेरी लावली. हवामान खात्याने वर्तवेलेल्या अंदाजानुसार आज गुरुवारी पाऊस कोसळला. त्यानंतर शहराचं ४१ डिग्री सेल्सिअसपर्यंत पोहोचलेल्या तापमानापासून मोठा दिलासा मिळाला आहे. या अवकाळी पावसामुळे उकाड्याने हैराण झालेल्या पुणेकरांना मोठा दिलासा मिळाला आहे.
पुणे शहरात झालेल्या पावसाने अनेक ठिकाणी रस्त्यावर पाणी जमा झाले आहे. पुण्यातील नांदेड सिटी परिसरातील रोडवर पाणी जमा झालं. त्यानंतर गाड्या चालवताना मोठी कसरत पुणेकरांना करावी लागत आहे. तर पुण्यातील शिरुर,आंबेगाव, खेड, जुन्नर तालुक्यातील अनेक भागाला जोरदार अवकाळी पावसाने झोडपलं.
आज दुपारी अचानक कोसळलेल्या पावसामुळे बळीराजा शेतकऱ्यांना मोठा फटका बसणार आहे. या अवकाळी पावसामुळे काढणीला आलेला कांदा आणि फळबागांना मोठा फटका बसणार आहे. तर ग्रामीण भागात अवकाळी पावसाने हजेरी लावल्याने वातावरणात गारवा निर्माण झाल्याने काही दिलासा मिळणार आहे. सकाळपासूनच परिसरात ढगाळ वातावरण पाहायला मिळत होतं. त्यानंतर आज दुपारनंतर या भागात जोरदार अवकाळी पाऊस बरसला आहे.
हिंगोलीच्या जिल्ह्यात अवकाळी पावसाने हजेरी लावली. आज गुरुवारी दुपारच्या सुमारास अचानक पावसाने हजेरी लावली. अचानक पडलेल्या पावसामुळे नागरिकांची मोठी तारांबळ उडाली होती, तर मुख्य बाजारपेठेतील व्यापाऱ्यांची देखील पावसामुळे पंचायत झाली. या पावसामुळे उकाड्याने हैराण असलेल्या नागरिकांना दिलासा देखील मिळाला.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.