अजय दुधाणे, उल्हासनगर

उल्हासनगरमध्ये (Ulhasnagar) धक्कादायक घटना घडली आहे. इमारतीच्या पाचव्या मजल्यावरून लिफ्ट अचानक कोसळली. या लिफ्टमध्ये एक वृद्ध आणि त्यांचा अडीच वर्षांचा नातू होता. या घटनेमध्ये आजोबांनी आपल्या नातवाला वाचवले पण ते गंभीर जखमी झाले आहेत. त्यांच्यावर सध्या उल्हासनगरच्या खासगी रुग्णालयात उपचार सुरू आहेत. या घटनेमुळे उल्हासनगरमध्ये खळबळ उडाली आहे.

मिळालेल्या माहितीनुसार, उल्हासनगरच्या कॅम्प नंबर -४ मध्ये ही घटना घडली आहे. याठकाणी असणाऱ्या सत्यजीवन इमारतीमध्ये पिंजारी कुटुंबीय राहतात. सरदार पिंजारी हे या इमारतीमध्ये राहणाऱ्या आपल्या भावाला भेटण्यासाठी आले होते. भावाची भेट झाल्यानंतर सरदार पिंजारी हे अडीच वर्षांच्या नातवाला घेऊन लिफ्टमधून खाली येत होते. त्याचवेळी अचानक लिफ्ट पाचव्या मजल्यावरून खाली जोरात कोसळली.

लिफ्टमध्ये बिघाड झाल्यामुळे ती खालच्या मजल्यावर आदळली माहिती समोर आली आहे. यावेळी लिफ्टमधील काही भाग हा सरदार पिंजारी यांच्या अंगावर उडाला. ज्यात पिंजारी यांच्या हाताचे आणि पायाचे हाड फ्रॅक्चर झालं आहे. पिंजारी यांच्यासोबत त्यांचा अडीच वर्षांचा नातू देखील होता. पिंजारी यांनी त्याला आपल्या छातीकडे जोरात पकडून ठेवल्यामुळे त्याला काही झाले नाही. आजोबांनी आपला जीव धोक्यात घालून चिमुकल्याचे प्राण वाचवले.

लिफ्ट कोसळल्यानंतर इमारतीमध्ये मोठा आवाज झाला त्यामुळे सगळे घाबरले. या इमारतीमध्ये राहणाऱ्या नागरिकांनी लिफ्टच्या दिशेने धाव घेतली. याची माहिती तात्काळ टेक्निशियनला देण्यात आली. त्यानंतर लिफ्टमधून सरदार पिंजारी आणि त्यांच्या नातवाला बाहेर काढण्यात आले. जखमी झालेल्या सरदार पिंजारी यांना तात्काळ खासगी रुग्णालयात दाखल करण्यात आले. त्यांच्या हात आणि पाय फॅक्टर झाले आहेत. या घटनेमुळे उल्हासनगरमध्ये खळबळ उडाली आहे.