देशात पुन्हा राजकीय घडामोडींना वेग आला आहे. ममता बॅनर्जी यांचा पक्षातील २२ खासदार फुटले. त्यानंतर आता ठाकरेंचे खासदार फुटणार असल्याची माहिती हाती आली आहे. ठाकरेंचे खासदार वेगळा गट स्थापन करणार असल्याची माहिती सूत्रांनी दिली आहे. ठाकरेंचे खासदार संजय देशमुख यांनी प्रतापराव जाधव यांची भेट घेतल्यानंतर राजकीय वर्तुळात चर्चांन उधाण आलं आहे.

देशातील काही राज्यात विधानसभा निवडणुका झाल्यानंतर फोडाफोडीच्या राजकारणाला पुन्हा सुरूवात झाल्याचे दिसून येत आहे. पश्चिम बंगालमध्ये ममता बॅनर्जी यांच्या पक्षाचे जवळपास ५८ आमदारांनी बंडखोरी केली. त्यानंतर जवळपास २२ खासदारांनी बंडखोरी केली. पश्चिम बंगालनंतर आता महाराष्ट्रातही फोडाफोडी होणार असल्याची चर्चा राजकीय वर्तुळात सुरू झाली आहे.

ऑपरेशन टायगरच्या पार्श्वभूमीवर काल उद्धव ठाकरे यांच्या मातोश्री निवासस्थानी पक्षाच्या खासदारांची बैठक झाली. या बैठकीला मोजक्या खासदारांनी हजेरी लावली. तर काहींनी बैठकीला ऑनलाइन हजेरी लावली. या बैठकीनंतर संजय राऊत यांनी ठाकरेंच्या शिवसेनेत फूट पडणार असल्याचे दावे फेटाळून लावले होते.

दुसरीकडे दिल्लीत आज ठाकरेंच्या खासदारांच्या गोटात हालचाली वाढल्या आहेत. ठाकरेंचे खासदार संजय देशमुख यांनी आज दिल्लीत केंद्रीय राज्यमंत्री प्रतापराव जाधव यांची भेट घेतली. या भेटीनंतर ठाकरेंच्या शिवसेनेत फूट पडणार असल्याची चर्चा राजकीय वर्तुळात वाऱ्यासारखी पसरली. वेगळ्या गटाची स्थापना करण्यासाठी ठाकरेंच्या खासदारांच्या गोटात हालचाली वाढल्याची चर्चा आहे. ठाकरेंचे काही खासदार लोकसभा अध्यक्षांना भेटणार असल्याची माहिती सूत्रांनी दिली आहे. त्यात काल मातोश्रीवर आयोजित केलेल्या बैठकीला पक्षाचे ५ खासदार गैरहजर होते. त्यामुळे चर्चांना अधिक उधाण आलं आहे.