मुंबई : एकनाथ शिंदे (Eknath Shinde) यांनी जवळपास 40 हून अधिक आमदारांसह बंड केल्याने शिवसेना (Shivsena) अडचणीत सापडली आहे. मुख्यमंत्री उद्धव ठाकरे यांनी भावनिक आवाहन केल्यानंतर शिंदे यांनी बंड सुरूच ठेवलं आहे. अशातच शिंदे यांच्या बंडानंतर शिवसेनेने आज तातडीने राष्ट्रीय कार्यकारिणी समितीची बैठक दुपारी शिवसेना भवन येथे बोलावली आहे. या बैठकीत एकनाथ शिंदे यांचे राष्ट्रीय कार्यकारणी समितीतून हकालपट्टी करण्याचा निर्णय घेण्यात येईल अशी माहिती सूत्रांनी दिली आहे. (Eknath Shinde Latest News)

शिवसेनेच्या राष्ट्रीय कार्यकारिणीची बैठकीला उपस्थित राहण्याचे आदेश शिवसेनेतील सर्व पदाधिकाऱ्यांना देण्यात आले आहे. या बैठकीत एकनाथ शिंदे यांची राष्ट्रीय कार्यकारणीतून हकालपट्टी करण्याचा ठराव मांडला जाऊ शकतो अशी माहिती सूत्रांनी दिली आहे. शिवसेनेच्या राष्ट्रीय कार्यकारिणीत उद्धव ठाकरे, आदित्य ठाकरे, सुभाष देसाई, दिवाकर रावते, लीलाधर डाके, रामदास कदम, संजय राऊत, सुधीर जोशी, अनंत गीते, एकनाथ शिंदे, चंद्रकांत खैरे आणि आनंदराव अडसूळ यांचा समावेश आहे.

शिवसेनेच्या राष्ट्रीय कार्यकारिणीने 2018 मध्ये पक्षप्रमुख पदी उद्धव ठाकरे यांची निवड केली. त्यानंतर वेळोवेळी झालेल्या राष्ट्रीय कार्यकारिणीच्या बैठकीत उद्धव ठाकरे यांनाच अध्यक्षपदी निवडण्यात आले. एकनाथ शिंदे यांनी शिवसेनेत बंड केल्यामुळे त्यांच्या राष्ट्रीय कार्यकारणी सदस्यपदावर आता गदा आली आहे. तसेच सुधीर जोशी यांच्या निधनामुळे राष्ट्रीय कार्यकारणीतील एक जागा रिक्त झाली आहे. त्यामुळे या रिक्त जागेवर नव्या नेत्याची निवड या राष्ट्रीय कार्यकारणीच्या बैठकीत होईल अशी माहिती सूत्रांनी दिली. (Eknath Shinde Marathi News)

एकनाथ शिंदे यांच्या बंडानंतर त्यांची राष्ट्रीय कार्यकारणीतून हकालपट्टी केल्यानंतर ते फक्त शिवसेनेचे सदस्य म्हणून कार्यरत असतील. मात्र, त्यांच्याकडे कोणत्याही पदाचा आता पदावर नसेल असेही या सूत्रांनी सांगितले. दुसरीकडे एकनाथ शिंदे आमदारांसह गुवाहाटी येथील एका पंचतारांकित हॉटेलमध्ये थांबले आहेत.

माहितीनुसार एकनाथ शिंदे आता नवा गट स्थापन करणार असून या गटाचं नावही ठरवण्यात आलं आहे. 'शिवसेना बाळासाहेब ठाकरे गट' असं या गटाचं नाव ठरलं असून लवकरच याची अधिकृत घोषणा केली जाईल असं बंडखोर आमदारांकडून सांगण्यात आलं आहे.

Edited By - Satish Daud