नवी मुंबईच्या राजकीय वर्तुळातून मोठी बातमी समोर आली आहे. नवी मुंबईत ठाकरे गटाचे नेत्यावर हल्ला झाल्याची घटना घडली आहे. नवी मुंबईतील तुर्भे पोलीस स्टेशनच्या आवारातच गुरुवारी दुपारी हल्ला झाला आहे. या घटनेने नवी मुंबईच्या राजकीय वर्तुळात खळबळ उडाली आहे.

साम टीव्हीने दिलेल्या माहितीनुसार, नवी मुंबईतील ठाकरे गटाचे उप शहर प्रमुख महेश कोटीवाल यांच्यावर हल्ला झाल्याची प्राथमिक माहिती मिळाली आहे. काही महिलांनी तुर्भे पोलीस ठाण्याच्या आवारात त्यांच्यावर हल्ला केला.

अचानक हल्ला झाल्याने पोलीस स्टेशनच्या आवारात एकच खळबळ उडाली आहे. महेश कोटीवाल नवी मुंबई ठाकरे गटाचे उप शहर प्रमुख असून ते तक्रार करण्यासाठी पोलिस ठाण्यात आले होते. पोलिस ठाण्यातून बाहेर पडताना काही महिलांनी हल्ला केला. हल्ल्याचे कारण अजूनही स्पष्ट नाही. संबंधित महिलांविरोधात तक्रार दाखल करण्यासाठी महेश कोटीवाल पोलिस ठाण्यातच बसले आहे.

मारहाणीचा व्हिडिओ व्हायरल

व्हिडिओमध्ये दिसत आहे की, 'महेश कोटीवाल यांच्यासोबत काही कार्यकर्ते होते. ते पोलीस स्टेशनच्या आवारात उभे होते. त्यावेळी दोन महिलांनी महेश कोटीवाल यांना घेरलं. त्यानंतर कोटीवाल यांच्याशी हुज्जत घालण्यास सुरुवात केली. दोन्ही महिला आणि महेश कोटीवाल यांच्याशी वाद झाला. बाचाबाचीनंतर दोन्ही महिलांनी महेश कोटीवाल यांना मारहाण करण्यास सुरुवात केली. काही जण वाद सोडवण्यास आले. त्यानंतरही मारहाण सुरू होते. पुढे एक पोलीस कर्मचाऱ्याने दोघांमधील वाद सोडवला.

महेश कोटीवाल यांना मारहाण करतानाचा व्हिडिओ सोशल मीडियावर व्हायरल झाला आहे. दोन्ही महिलांनी कोटीवाल यांना मारहाण का केली, याची अधिकृत माहिती समोर आलेली नाही. तसेच या प्रकरणात महेश कोटीवाल यांच्याकडूनही कोणतीही प्रतिक्रिया आलेली नाही.