राज्यात थंडीचा कडाका कमी झाला असला तरी काही भागांत हुडहुडी कायम आहे. बऱ्याच ठिकाणी पारा अद्याप १० अंशांच्या खाली गेला आहे. आज राज्याच्या किमान तापमानात चढ-उतार होण्याचे संकेत असले तरी, थंडी कायम राहण्याची शक्यता हवामान विभागाने वर्तवली आहे. सतत बदलणाऱ्या हवामानामुळे नागरिकांना अनेक आजारांना सामोरे जावं लागत आहे.

काल निफाड आणि परभणी येथे ७ अंश सेल्सिअस तापमानाची नोंद झाली. धुळे येथे ७.२ अंश सेल्सिअस तापमानाची नोंद झाली. अहिल्यानगर येथे ९ अंश, तर पुणे, जेऊर, मालेगाव, ‎‎नाशिक, जळगाव, भंडारा आणि यवतमाळ येथे १० अंशामपेक्षा कमी तापमानाची नोंद झाली.

महाराष्ट्रातील निफाड, धुळे, परभणी, अहिल्यानगर येथे काल थंडीचा कडाका कायम होता. उर्वरित राज्याच्या किमान तापमानात वाढ झाली असली तरी गारठा कायम होता. आज राज्यातील कमाल आणि किमान तापमानात चढ-उतार होण्याची शक्यता असली, तरी थंडी कायम राहण्याचा अंदाज हवामान विभागाने वर्तवला आहे. थंडीच्या कडाक्यामुळे ठिकठिकाणी शेकोट्या पेटलेल्या पाहायला मिळत आहेत. तर तापमानात होणाऱ्या सततच्या बदलावामुळे नागरिकांना विविध आजारांना सामोरे जावं लागत आहे.