संघर्ष गांगुर्डे, कल्याण

टिटवाळ्यात धक्कादायक प्रकार उघडकीस आला आहे. गजानन पॅलेस सोसायटीमध्ये एका भाडेकरूच्या घरासमोर संशयास्पद वस्तू आढळून आल्या आहेत. यानंतर परिसरात एकच खळबळ उडाली. याप्रकरणी मनसेने दखल घेत सखोल चौकशी करण्याची मागणी पोलिसांकडे केली आहे.

मिळालेल्या माहितीनुसार, गजानन पॅलेस सोसायटीच्या ए-विंगमधील एका फ्लॅटच्या दरवाजासमोर अज्ञात व्यक्तीने कोहळा, लिंबू, कोंबडीचे पाय आणि त्यामध्ये चार टाचण्या ठेवून तेथून निघून गेल्याचे आढळून आले. ही घटना संशयास्पद वाटत असल्याने संबंधित भाडेकरूने याबाबत सोसायटी आणि स्थानिक नागरिकांना माहिती दिली.

घटनेनंतर सोसायटीमधील सीसीटीव्ही फुटेजची तपासणी करण्यात आली. त्यामध्ये एक अज्ञात व्यक्ती संबंधित घरासमोर ही वस्तू ठेवताना दिसून आली आहे. मात्र, फुटेजमध्ये त्या व्यक्तीचा चेहरा स्पष्ट दिसत नसल्याने त्याची ओळख अद्याप पटलेली नाही. त्यामुळे या प्रकारामागे नेमका कोणाचा हात आहे? याबाबत अनेक प्रश्न उपस्थित होत आहेत.

दरम्यान, महाराष्ट्र नवनिर्माण सेनेच्या स्थानिक पदाधिकाऱ्यांनी या घटनेची दखल घेत पोलिसांकडे लेखी तक्रार दाखल केली आहे. संबंधित व्यक्तीचा शोध घेऊन या प्रकरणामागील सत्य समोर आणावे, तसेच परिसरातील नागरिकांमध्ये निर्माण झालेली भीती दूर करण्यासाठी पोलिसांनी तातडीने कारवाई करावी, अशी मागणी मनसेकडून करण्यात आली आहे. या प्रकरणी पोलिसांनी प्राथमिक चौकशी सुरू केली असून उपलब्ध सीसीटीव्ही फुटेजच्या आधारे संशयिताचा शोध घेण्याचे प्रयत्न सुरू आहेत.