ठाणे रेल्वे स्थानक हे मध्य रेल्वेवरील सर्वाधिक गर्दीचे स्थानक आहे. ठाणे स्टेशनवर कधीही जा गर्दी असतेच. त्याशिवाय पार्किंगचा प्रश्नही गंभीर आहे. ठाणे स्थानकावरील सर्व समस्यांचा तोडगा निघणार आहे. ठाणे रेल्वे स्टेशनचा कायापालट होणार आहे. पुनर्विकासात येथे ११ मजल्यांचा भव्य टॉवर उभारण्यात येणार आहे.

कायापालट झाल्यानंतर ठाणे स्टेशन हायफाय अन् मॉर्डन होणार आहे. पार्किंग, हॉटेल, दुकानासह अनेक सोयी सुविधा ठाणे स्थानकावर मिळतील. लोकांच्या समस्या लक्षात घेता ११ मजली इमारात उभारण्याचा निर्णय घेण्यात आला आहे. रेल्वे आणि ठाणे महापालिका या स्थानकाचा 'मल्टीमॉडेल ट्रांझिट हब' म्हणून विकास करत आहे.

ठाणे स्टेशनवर होणाऱ्या या ११ मजली टॉवरमुळे चांगला महसूल गोळा होणार आहे.सर्वकाही गोष्टी तुम्हाला एकाच ठिकाणी उपलब्ध होणार आहे. या टॉवरचे काम ३० जून २०२६ पर्यंत पूर्ण होऊ शकते. ठाणे स्टेशनच्या १०A च्या जवळ असलेल्या ९००० स्क्वेअर मीटरमध्ये हा प्रोजेक्ट होणार आहे.

या नवीन टॉवरमध्ये पार्किंग आणि इतर सर्व्हिसेसचा समावेश आहे. याचसोबत रेल्वेसाठी अनेक सुविधा असणार आहे. तसेच कॉनकोअर्स लेव्हलवर बस वाहतूकीसाठी जागा असणार आहे. तळमजला आणि पोट मजल्यावर रेल्वे सुविधा आणि कॉनकोर्स फ्लोअर प्रवासी बसेससाठी असणार आहे. तसेच आठ अतिरिक्त मजल्यांचा व्यावसायिक वापर केला जाणार आहे.

अनेक रिटेल शॉप, फुड कोर्ट आणि रेस्टॉरंट, गेमिंग झोन, कोचिंग इन्स्टिट्युट, हॉटेल आणि सर्व्हिस अपार्टमेंटचा समावेश आहे. हा टॉवर ईस्टर्न एक्सप्रेस वेला जोडला जाणार आहे. फक्त २.२४ किलोमीटर अंतरावर हा एक्सप्रेस वे आहे. तसेच बससाठी स्पेशल जागा ही प्लॅटफॉर्म १०च्या जवळ दिली जाणार आहे. मल्टी मॉडेल ट्रांझिट हब अंतर्गत बस, रेल्वे आणि मेट्रो जोडली जाणार आहे.