ठाणे : कासावडवली भागातील मार्केट परिसरात अनाधिकृत फेरीवाल्यावर कारवाई करण्यासाठी गेलेल्या महापालिकेच्या माजिवडा मानपाडा सहाय्यक आयुक्त कल्पिता पिंपळे यांच्यावर फेरीवाल्याने चाकू हल्ला केल्याची घटना समोर आली आहे. या घटनेत त्यांच्या डाव्या हाताची दोन बोटे कापली गेली आहेत. तर त्यांना वाचविण्यासाठी पुढे सरसावलेल्या अंगरक्षकावर देखील हल्ला करण्यात आला आहे.

त्याचे देखील एक बोट कापले गेल्याची माहिती समोर आली आहे. त्यांच्यावर आता येथील खाजगी रुग्णालयात उपचार सुरु आहे. या प्रकरणी हल्ला करणाऱ्या फेरीवाल्याला कासारवडवली पोलिसांनी ताब्यात घेतले आहे. ही घटना सांयकाळी ६.३० च्या सुमारास घडली आहे. या घटनेत हल्ला करणाऱ्या अमरजीत यादव याला पोलिसांनी मोठय़ा शिताफीने अटक केली आहे.

पहा व्हिडिओ-

ठाणे महापालिकेच्या माध्यमातून सध्या शहरातील अनाधिकृत बांधकामांपाठोपाठ फेरीवाल्यांवर कारवाई करण्यास सुरवात केली आहे. त्यानुसार मागील आठवडय़ापासून ही कारवाई सुरु आहे. अशाच प्रकारे माजिवडा मानपाडा प्रभाग समितीच्या सहाय्यक आयुक्त कल्पिता पिंपळे यांच्यासह त्यांच्या पथकाने घोडबंदर भागातील कासारवडवली या ठिकाणी मुख्य मार्केटमध्ये पदपथ आणि रस्ते अडविणाऱ्या फेरीवाल्यांवर कारवाई करण्यासाठी गेले होते.

सांयकाळी ६.३० च्या सुमारास ही कारवाई सुरु होती. त्यावेळेस एका फेरीवाल्यावर कारवाई करण्यासाठी पथक पुढे सरसावत असतांनाच संतप्त झालेल्या फेरीवाल्याने, रागाच्या भरात पिंपळे यांच्यावर चाकू हल्ला केला आहे. फेरीवाल्याने त्यांच्या डोक्यावर चाकू भिरकवला असता, त्याचवेळेस हल्यामुळे बचाव करण्यासाठी पिंपळे यांनी डोक्यावर हात ठेवला.

त्यामध्ये हा हल्ला त्यांच्या हातावर झाला आणि त्यामध्ये त्यांच्या डाव्याहाताची दोन बोटे कापली गेली ती तुटुन खाली पडली. तर या हल्याचा बचाव करण्यासाठी पुढे सरसावलेल्या त्यांच्या अंगरक्षकाच्याही डाव्या हाताचे एक बोट कापले आहे. अखेर अमरजित यादवला पोलिसांनी नागरिकांच्या मदतीने अटक केली आहेत.

Edited By- Digambar Jadhav